COVALIMA—–Ministru Obras Públika (MOP) Abel da Silva Pires, hamutuk ho autoridade Covalima sesta (13/01) ne’e hala’o inaugura bee-moos, iha Hatu No Lela ,suku holpilat, Postu Administrativu Maucatar, Munisípiu Covalima.
Iha serimónia inaugurasaun ne’e komunidade iha aldeia Lela no Hatu, simu Ministru Obras Públika (MOP) ho kultura husi Suku Holpilat nian.
Ministru Obras públika (MOP), Abel da Silva Pires kontente bainhira halo inaugurasaun bee moos iha aldeia Hatu no Lela, iha suku holpilat.
“Ita halo inuagurasaun ba bee moos ne’ebe projetu inisiu hetan apoiu husi embaixada korea tanba orsamentu la sufiénte entaun ami simu proposta husi CVTL oinsa ajuda fundu bele kompleta tanba ministériu sempre apoiu. tanba bee mak fó moris ba ita” informa MOP, Abel da Silva Pires ba jornalista sira iha aldeia Lela, suku Holpilat, Postu Administrativu Maucatar.
Nia dehan governu apoiu fundu iha fatin barak komesa ona kompleta ohin halo inaugurasaun nia kontente komunidade servisu ho lais no forma kedas ekipa atu halo manutensaun ba bee moos.
“ami kontente bainhira sira servisu ho lalais sira forma ona ekipa manutensaun ida ne’e sai ezemplu di’ak” nia dehan.
Ministru husu ba komunidade sira uza bee moos ho kuidadu nune’e ema hotu bele asesu bee moos ho durasaun tempu naruk.
Sekretáriu Jerál CVTL Luis pedro hateten, projetu dada bee moos antes ne’e CVTL hetan apoiu fundu husi governu Korea la konsege finaliza, maibé apoiu husi MOP ohin loron bele inuagura.
“Orsamentu ne’ebé ami hetan projetu ida ne’e hahú iha tinan-2017 ne’ebé mai husi governu korea to’o iha tinan 2019 projetu no orsamentu hotu, maske projetu atividade finaliza ona, maibé projetu bee moos seidauk hotu. entaun ami haruka proposta ba MOP apoiu fundu $ 36,000.00” nia dehan.
Durante ne’e, MOP la’os apoiu fundu hodi dada bee moos ba komuniade la’os iha suku Holpilat, maibé ba mós munisípiu sira hanesan, Ainaro no Ermera.
Ho nune’e oinsa, CVTL bele servisu ho komunidade implementa projetu ne’e, durante fulan tolu ne’ebé finaliza iha fulan dezembru realiza serimónia inaugurasaun, iha fulan janeiru.
Bee moos importante ba ema hotu, ba komunidade vulneravél iha fatin sira ne’ebé, akontese dezastre bee moos sai hanesan pontu importante
“Ita koalia bee moos sai hanesan direitu fundamentu ema hotu tenke asesu ba bee moos bele hadia nia moris” nia informa.
Komunidade sira tenke kuidade no halo manutensaun ba bee moos, kuidadu kanu sira ne’e, labele estragu husu sira nia kontribuisaun orsamentu atu halo manutensaun ba bee moos nune’e labele depende de’it orsamentu husi governu.
Tanba , CVTL garante bee moos bainhira tempu bailoro sei la maran, maibé devitu bee moos sei menus.
Xefe Suku Altu Lebos, Emilio do Carmo Gusmão hateten, ohin bele inaugura bee moos molok ne’e atu inagura lori prosesu naruk maske ukun aan tinan 20-resin komunidade sempre hakilar beibeik ba bee moos.
“Haree ba geografika komunidade sira iha Suku holpilat hela iha área foho leten, entaun ita servisu hamutuk ho CVTL hodi ikdentifika bee moos hodi halo aprosimasaun ho suku viziñu xefe suku Altu Lebos hodi hetan duni nia rezultadu ohin loron ita realiza serimónia inugurasaun” nia dehan.
Suku Holpilat kompostu husi Aldeia Hatu, Lela, Nainare, Manulor, Leogore ho Fatuk-Oan ho nia populasaun 2,7254
Enkauntu CVTL implementa projetu dada bee moos ne’e benefisiáriu husi aldeia Lela ho Hatu hamutuk uma kain–134 ho total populasaun 617. (Azu)
