Covalima (RCCT) 08-01-25-Ministeriu Finansas (FM) liu husi Diresaun Nasional Alinasaun Bens no Movies (DNABM) taka ona numeru lot ba motorizada hamotuk unidade 65 no kareta hamotuk unidade 4 o mos trator unidade 2 iha munisipiu covalima hodi prepara ba lelaun katerogia konkursu publiku hamotuk motor 25 no kareta, konkursu interna iha motorizada 40 no mos trator 2.
Funsionariu Diresaun Nasional Alinasaun Bens no Movies (DNABM) iha Ministeriu Finansas, Filomeno Soares de Araujo, hatete lelaun ba transporte hanesan kareta no motorizada ne’e hala’o iha munisipiu hotu inklui mos iha Covalima.
“Ami husi Diresaun Nasional Alinasaun Bens no Moveis (DNABM) patrimonia estadu ba nasional. Ami halo lelaun ne’e ba munisipiu hotu inklui mos Covalima, no iha Covalima hamutuk motizada hat nulu resin, depois aprendidus husi polisia no Ministeriu Publiku hamutuk motorizada 25, inklui kareta-4 no trator-2, ida ne’e maka ohin ami hahu taka lot ba iha bens no moveis estadu nian sira ne’e para halo lelaun.”
“loloos ne’e hala’o iha tinan 2024 maibe iha situasaun ne’ebé ladun di’ak no prosesu ne’ebé naruk ne’e maka ami realiza iha 2025 nian, prosesu lelaun ba rekerentes sira ne’ebé atu hatama dokumentus ne’e iha hotu nasional, maibe ekipamentus sira ne’e destaka iha munisipiu hotu, ne’ebé rekerentes atu kompete dokumentus sira sei hatama hotu iha alinasaun nasional” informa Funsionariu Diresaun Nasional Alinasaun Bens no Moveis (DNABM) Filomeno Soares de Araujo, ba jornalista sira hafoin remata taka lot ba motorizada ne’ebé rai iha resintu Administrasaun Munisipiu Covalima.
Nia afirma lelaun fahe ba kategoria rua, mak hanesan lelaun Internal nomos lelaun ka konkursu publiku ba motorizada unidade 25 ne’ebé prende husi polisia no mos Ministeriu Publiku.
“Lalaok husi prosesu lelaun ne’e mai husi parte rua, parte iha ba parte publiku ka ba ema hotu no ida internal ba funsionariu sira ne’ebé hala’o servisu iha diresaun ida ne’ebé ka iha ministeriu ida ne’ebé bele hatama dokumentus hodi kompeta iha lelaun ne’e, tipu lelaun ne’e ba motorizada ho kareta hilux no triton, maibe ba kareta bo’ot hanesan trek ne’e tama iha lelaun publiku, motorizada mos iha parte interna no publiku ba motirizada sira ne’ebé prende husi polisia no ministeriu publiku ida ne’e vigora ona ba estadu nia tama ona ba lelaun publiku” nia dehan.
Diretór Servisu Munisipal Patrimonio no Lojistiku Munisipiu Covalima, Aquinelio A. Barros do Rego, informa iha fulan jeneiru nia laran hahu ona fo oportunidade ba publiku atu bele foti formulariu konkursu ba lelaun motor no kareta iha Administrasaun Munisipiu Covalima.
“foti formularia ba iha atividade lelaun ne’e iha konkursu publiku maka sei monu iha loron13-24 fulan janeiru 2025 ne’e sei hahu husi oras tuku 9 to’o 11: 30 ne’e parte dader no ba iha parte lokraik tuku 2:30 to’o tuku 5 oras Timor-Leste, ba iha inspesaun fiziku ne’e ba ita nia komunidade no funsionariu sira bele mai halo ona inspesaun fiziku ka bele mai hare direita ho matan ba motorizada sira ne’ebé oras ne’e rai hela iha administrasaun munisipiu” nia informa.
Minusteriu Finansas Liu husi Diresaun Nasional Alinasaun Bens no Moveis (DNABM) sei halo lelaun ba patremonia estadu iha munisipiu covalima ba motorizada hamotuk unidade 65 ne’ebé iklui motorizada nebe aprendidus husi Polisia no mos Ministeriu Publiku hamotuk unidade 25, kareta 4 mai husi Servisu munisipal Agrikultur no mos Servisu Munisipal Saude no mos trator 2 husi agrikultur, engkuantu motorizada 40 ba konkursu ka lelaun intrena ne’e mai husi Administrasaun Munisipiu Covalima iha motorizada 20, Servisu Munisipal Agrikultur iha motorizada 15 no mos Servisu Munisipal Edukasaun iha motorizada unidade 5.
Jornalista : Julio Salinas
Editor : Chamot Nahac
