Covalima (RCCT) 16-05-24-Ekipa husi Ministeriu Ensino Superior Ciensia no Cultura (MESCC), ne’ebé lidera husi Diretór Nasional Ensino Superior, MESCC, Hogino Alves, halo audensia hodi alatualiza ba Prezidente Autorudade Munisipiu (PAM) Covalima, Miguel Armada Cardoso, konaba rai hekrares 13 iha Aldeia Akar Laran, Suku Suai-Loro, Postu Administrativu Suai ne’ebe identifika ona atu hari eskola politekniku enjinaria.
Diretór Nasional MESCC, Hogino Alves, hatete planu estabelesementu politekniku enjenaria iha Suai atu responde ba planu estratejiku 2011-2030.
“ne’e bazeia ba planu estratejiku 2011-2030 ne’ebé maka fo oportunidade liu ba politekniku enjenaria ne’ebé maka atu organiza iha Suai, ho ida ne’e maka ami ekipa husi Ministeriu liu husi diresaun jeral ensino Superior no diresaun nasional ensino Superior mai halo liña kordenasaun ba autoridade lokal sira para atu atualiza fali konaba rain sira ne’ebé maka iha kuadru governu halo ona atribuisaun no rai sira ne’ebé estabelese, tanba rai ne’e buat ida ne’ebé sensitivu liu no mos planu husi ministeriu sira ne’e barak,” informa Diretór Nasional MESKK, Hogino Alves, ba jornalista sira hafoin remata halo sorumutu ho PAM Covalima, Miguel Armanda Cardoso, iha Administrasaun Munisípiu Covalima, Kinta (16/05).
Prezidente Autoridade Munisipiu (PAM) Covalima, Miguel Armada Cardoso, informa molok ne’e autoridade munisipiu sesante sira halo ona prosesu konaba atu hari eskola politekniku enjenaria iha eskola teknika vokasional akar laran, utiliza rai haotuk hetares 13, nune’e, ho kualidade hanesan prezindete autoridade Miguel Armada fo Apoiu tomak ba prosesu dezenvolvimentu ne’e bele kontinua la’o to finalidade.
“Fatin ne’ebé identifikadu maka iha Eskola Tekniku Vokasional Akar Laran, Suku Suai Loro, rai ne’ebé identifika ona katak iha hektares 13, komunidade sira mos oferese ona, tan ne’e sira mai observa tuir no konsulta fila fali rai ne’e loos ka lae?, tan ne’e nudar PAM fo apoiu no kolabora ho sira katak se bainhira ita bo’ot sira harii duni sei fo benefisiu ba Munisipiu Covalima, nudar autoridade fo apoiu masimu, hanesan PAM sujere ba sira katak rai sira ne’ebé identifika iha lideransa komunitaria, administrador sesante sira fo ona ba ita bo’ot sira atu halo ita bo’ot sira nia programa iha fatin ne’eba PAM nudar autoridade ne’e hatutan deit programa uluk ne’ebé sira inisiu konkorda malu ona” PAM Covalima Miguel Armada Cardoso Informa.
Etretantu ekipa husi Ministeriu Ensino Superior Ciensia no Cultura ohin dader ida ne’e marka ajenda ho PAM no mos lina ministeriais sira inklui Administrador Postu Administrativu Suai no Xefe Suku Suai-Loro, Diretora Edukasaun Munisipiu no mos Diretor Terras Propriedade Munisipiu hodi atualiza autoridade lokal sira konaba planu governu atu hari eskola politekniku enjinaria.
Jornalista : Julio Salinas
Editor : Chamot Nahac
