Covalima (RCCT) 15-03-24-Iha Kinta (14/03) feira Ajensia Internasional Mercy Corps iha Timor-Leste hamutuk ho Autoridade Munisipiu no hala’o inagurasaun be mos iha Aldeia Baulela, Suku Ogues, Postu Administrativu Maukatar. Nune’e komunidade sira iha Aldeia Baulela hamotuk Uma Kain 70 ho total polulasaun ema na’in 288 bele ona asesu ba be mos ho dignu hodi nesesita moris loro loron nian.
Ho inaugurasaun be mos ne’e, Xefe Suku Ogues Febriano Atok Pereira, husu ba komunidade Aldeia Baulela atu utiliza be mos ho responsavelidade.
“Ida ne’e ha’u hanoin ba programa Mercy Corps ami agradese ba kontribuisaun sira hotu ne’ebé iha, aproveita momentu ida ne’e atu hato’o ami nia rekomendasaun ruma ba tantu ajensia no mos governu ne’ebé ohin loron ita hanoin fokus ba objetivu dezenvolvimentu sustentavel katak atu labele husik ema ida iha kotuk kualker situasaun, biban ne’e mos apela ba komunidade tomak iha Baulela aproveita utilizasaun bee moos ida ne’e kuidadu no labele halo diskriminasaun ba malu tenke nakloke ba malu hotu-hotu uza” dehan Xefe Suku Ogues Febriano Atok Pereira.
Iha biban no fatin hanesan, Country Diretóra Mercy Corps Timor-Leste, Jules Keane, liu husi nia intrevensuan hato’o apresiasaun ba komunidade tomak iha Aldeia Baulela ne’ebé fo sira nia kontribuisaun hodi servisu hamutuk ho ekipa Mercy Corps ho nia parseiru sira hodi atinje susesu ba projetu ida ne’e to’o halo inagurasaun.
“Apresia ba servisu hamutuk entre komunidade hotu, ba ekipa husi Mercy Corps ne’ebé maka kolabora hamutuk no mos parseiru sira seluk hodi ohin loron ita bele atinje ita nia projetu ida ne’e, se ita nia servisu hamutuk maka laloos karik ita sei la to’o pontu ida ne’ebé maka ohin ita atinje, ida ne’e di’ak tebes ita hotu bele sai sasin ba loron ohin, ba servisu ne’ebé ita halo no impaktu ne’ebé ita halo hatudu katak bee moos ne’ebé posibilidade bele prezente iha iha ita nia komunidade no mos ba uma kain sira iha komunidade ida ne’e, ita hotu hatene katak importansia husi bee moos ba ita nia moris no ba ita nia saude rasik” informa Country Diretora Mercy Cops Timor-Leste, Jules Keane, iha nia diskursu hafoin hala’o inagurasaun bee moos iha Aldeia Baulela.
Xefe Suku Ogues Febriano Atok Pereira, agradese ba Mercy Corps tanba pela primeiru ves Mercy Corps apoiu halo perfurasaun bee moos ba komunidade iha Aldeia Baulela, Suku Ogues, Lideransa Komunitaria ne’e mos rekomenda ba ajensia Internasional no governu atu hala’o dezenvolvimentu sustentavel hodi labele husik ema ida iha kotuk.
Jornalista : Julio Salinas
Editor : Chamot Nahac
