Covalima (RCCT) 19-11-24- Eskola Bazika Filial (EBF) 1,2 Baer dadaun ne’e infrenta menus Sala de Aula, kadeira no meja, obriga estudante klase rua tama hamutuk iha sala de aula ida hodi hala’o prosesu aprendijazen.
Estudante Jenifa Goreti Ornai dehan, Aleide menus fasilidade hanesan meja no kadeira, EBF 1,2 Baer mos infrenta konaba numeru manorin na’in la sufisiente ne’ebé prejudika estudante sira atu simu materia ho di’ak durante prosesu apredijazen.
“Ami la kontenti tanba, ami klase ida rua tama hamutuk sala ida no klase tolu, hat hamutuk sala ida, klase lima, neen hamutuk sala ida ida, ne’e ami senti la kontenti” Estudante Jenifa dehan.
Kordenadora Eskola Bazika Filial (EBF) 1,2 Baer Umbelina Madeira rekuñese durante ne’e aprendijazen la’o di’ak, maibe estudante sira preokupa tanba menus professor, sala de aula inklui meja no kadeira.
“Profesores mos la sufisiente ba ami nia alunus sira, sala de aula mos la to’o, kadeira ho meja mos la to’o, mak depois ami halo sira tenki tur mutu, ida ne’e mak difikulta duni ba ami nia estudante sira no ba profesores sira” Esplika Kordenadora EBF 1,2 Baer, Umbelina Madeira.
Tanba ne’e, Kordenadora Eskola Bazika Filial (EBF) 1,2 Baer Unbelina Madeira husu ba Ministeriu Edukasaun atu koloka profesores no aumenta sala de aula ba estudante sira iha EBF 1,2 Baer.
“Ami rekomenda hela ba parte Ministra edukasaun ba futuru oin mai tenki koloka profesores no hadi’a mos ami nia sala de aprendijazen ba ami nia alunus sira, depois tau netik eskritoriu ba professor sira ajuda mos kadeira ho meja ba ami nia alunus sira” Umbelina husu.
Entretantu total Sala de Aula 3 iha EBF 1,2 Baer ne’ebé Profesor hamotuk na’in 4 utiliza hodi hala’o prosesu Aprendijazen ba estudante hamutuk ema na’in 50, feto na’in 14 no mane hamotuk na’in 36.
Jornalista:Moichung
Editor : Chamot Nahac
