Anderias Nesi nudar vitima nia maun ne’ebé hetan mos baku husi Membru SNI, hasara ba Jornalista sira konaba kronolozia husi akontesementu ne’e, Membru SNI ho inisial GS lori kareta ho HILUX kor metan ida halai diresaun Fronteira to’o iha aldeia wetaba hetan juven sira tur iha keos ida iha Estrada ninin, maske halai liu tia maibe volta fali kareta hafoin mosu des-intendementu entre GS no joven sira maka foin lansa tiru kona Anderias Nesi nia alin Elizardo Cardoso Dasman.
“Ami tur iha kios oin ne’e, primeiru nia sai husi batas mai ne’e nia halai liu tiha nia fila kareta husi biliar nian ne’e, nia tun mai ami hanoin nia atu foti motor, maibe nia tun la husu ida nia baku fali ha’u kadera rua tohar tan ha’u ne’e mak nia tiru, ha’u rasta ha’u nia alin ses tia ba estrada laran, nia halai, ne’e mak nia tiru tuir ne’e, nia mai ho kareta nia uja Sivil nia tiru ho pistola dala rua, nia tiru iha kotuk sai fali iha kalilin nian, nia tiru hotu star kareta halai ba liu pos, nia tun husi kareta nia la ko’alia buat ida, ami tur hemu hela tua ituan, nia tun hau la husu ida, nia tun ne’e dehan ha’u tiru imi ka ? Ne’e mak ha’eu dehan maun ami sala saida?, nia dehan nusa karailu o hatan ne’e, nia baku ha’u depois ha’u rasta nia ain ne’e nia foti motor nia save nia lori ba liu postu. Nia mesak nia ho kareta Hilukx metan” Anderias Nesi hasara.
Komandante Polisia Nasional Timor Leste (PNTL) iha Munisipiu Covalima Superintendente Polisia Calisto Gonzaga, Rekuiñese hodi deklara mosu de-intendimentu ne’e wainhira membru SNI hala’o servisu sekreta iha area fronteira ne’ebé hamosu insidente lansa tiru rezulta joven na’in ida kanek no na’in ida seluk tohar iha liman k’wana.
Nune’e Komandante Calisto dehan prosesu ne’e sei la’o tuir dalan legal, ne’ebé hahu ho delijensia hodi rekolla evidensia, no halo aprensaun ba armas ne’ebé deskunfia utiliza hodi hakanek joven ne’e, nia mos dehan konstitui ona autor na’in ida iha insidente ne’e, deskonfia elaboradu nudar arguidu hodi prosesa ba 72oras hodi kontinua ba primeiru interogatoriu.
“Ha’u tenke ser deklara. Los duni insidente ida horikalan akontese por volta ita bele dehan 10:45 nune’e iha Aldeia Wetaba iha Suku Beiseuk postu Administrativu Tilomar Munisipiu Covalima, insidente ne’e mosu wainhira ita nia membru ne’ebé mak halo Servisu Sekreta, depois iha fatin ne’eba iha dez-intendementu itoan entre ita nian ho ita nia joventude iha ne’eba depois situasaun sira ne’e rezulta ita nia joven ida ne’ebé mak hetan kanek joven, horikalan ita evakua to’o ba iha hospital referal Suai depois tuir mediku sira atendementu insufisiente entaun evakua direita ba ospital nasional Guilovalidares, la’os joven ida ne’e deit maibe joven ida tan mos hetan faktura iha ninia liman tanba deit dez-intendimentu.”
Nia Kontinua dehan prosesu sira ne’e sei la’o tuir dalan legal, importante maka sei la fo rezerva, aberta hodi hahu hala’o delizensia no autonotisia konaba insedente ne’e.
“ita rekolla ona provas balu hanesan kartus ne’ebé mak ita hetan ona no ita halo ona mos apresaun ba kilat sira mak ita diskonfia uza,” Tenik Komandante Calisto.
Superintendente ne’e dehan sei identifika no prosesu teste balesti ba armas ne’ebé utiliza hodi hakanek Joven Elizardo Cardoso Dasman iha Aldeia Wetaba, Suku Beiseuk ne’e.
“Entaun iha autor ba isidente ida ne’e ita tenta hela maibe ita iha ida/rua ne’ebé mak ita bele konstitui hanesan arguidu depois prosesu 72horas ba iha primeiru interogatori se buat ruma la korta, lokraik ne’e ita aprezenta ona ba ministeriu publiku para depois ita aprezenta ba tribunais para nune’e evidensia sira ne’e valida regras ida ne’e mak pelumenus ita bele halo iha prosesu auto partisipasaun ida ne’e.” Tenik nia.
“ita foin identifika ema ida maka ita deskonfia ida ne’e elabora tebes no agora iha ona ha’u nia liman, iha komandu ona. ha’u hein katak jestaun fatin lokal de krimu ne’e remata ona ita nia ofisial sei halo partisipasaun depois objeitu sira ne’e, evidensia sira ne’e ita sei kanaliza ba tribunais no mos ministeriu publiku para bele hetan primeiru interogatoriu labele faila ida ne’e mak ita nia esforsu tomak ita sei esforsu hela ” Komandante PNTL Covalima Superintendete Polisia Calisto Gonza, Hakotu.
Engkuantu Vitima Elizardo Cardoso Dasman, evakua kedas husi fatin akontesementu ba iha ospital referal suai hodi halo tratamentu maibe tanba kondisaun grave maka vitima transfere liu ba ospital nasional Guilovalidares hodi hetan Salvasaun husi mediku sira.
Jornalista : Moichung
Editor : Chamot Nahac
