Covalima (RCCT)-14-11-24-Kinta ne’e Ministeriu Komersiu Indústria (MCI-Sigla Portuguesa), liu husi Diresaun Nasional Komersiu Externa realiza seminariu ho tema “Prosedementus Legais ba Exportasaun No Importasaun” hodi fo hanoin ba emprezariu sira atu bele servisu maka’as hodi kontribui ba hasa’e produsaun rai laran.
Diretór Diresaun Nasional Komersiu Externa, Mario Abrão, hatete durante ne’e atividade importasaun no exportasaun la’o laiha balansu ho razaun ne’e mak MCI, liu husi Diresaun Nasional Komersiu Externa fahe informasaun ba Emprezariu no Agrikultor sira iha munisipiu hotu konaba ba prosedimentu legais ba exportasaun no importasaun.
“Programa ida husi Komersiu Externa atu fahe informasaun ba munisipiu hotu, atu fo informasaun ba iha ita nia emprezariu sira ho ita nia agrikultor sira bele hatene oinsa prosesu atu halo exportasaun no importasaun, tanba ita hatene katak exportasaun no Importasaun laiha balansu, tanba ida ne’e maka iha hanoin ida husi Diresaun Nacional Komersiu Externa atu motiva ita nia emprezariu sira bele servisu maka’as hodi produs produtu rai laran atu bele iha kompetisaun iha merkadu internasional atu bele balansu ho nasaun ASEAN, ne’ebe ita hatene katak Timor-Leste mos atu sai membru ASEAN preaija ita servisu maka’as nune’e bele iha balansu exportasaun no Importasaun” deklara Diretór Diresaun Nasional Komersiu Externa, Mario Abrão, ba jornalista sira iha Salaun enkontru ba Dame CNE Munisipiu Covalima.
Prezidente Kamra Komersiu Industria (CCI-Sigla Portuguesa) Munisipiu Covalima, Grimaldi de Jesus hatete durante ne’e governu fo portunidade barak liu no la halo limitisaun ba ema estrajeiru hala’o atividade exportasaun no importasaun liu liu iha munisipiu Covalima.
“Tanba laiha limitasaun ba ema estranjeiru ne’ebé maka hatama sasan mai ita nia rain ida ne’e, ne’ebé ko’alia konaba exportasaun no Importasaun halo ema baruk ten tanba peluagn barak liu ne’e ema estranjeiru mai iha rai Suai ida ne’e, ema Indonezia liliu Xineza sira mai barak liu” nia dehan.
Entertantu Diretór Diresaun Nasional Komersiu Externa, Mario Abrão, husu ba emprezariu no agrikultor sira atu servisu maka’as hodi hasa’e produsaun rai laran tanba durante ne’e seidauk iha balansu entre exportasaun no Importasaun. Engkuantu seminariu ne’e hala’o iha salaun ba Dame CNE Munisipiu Covalima, ne’ebé hetan partisipasaun husi Sekretariu Munisipal Asuntu Sosial no Organizasaun Komunitaria Filomeno Cardoso, Prezidente Kamra Komersiu Industria (CCI) Munisipiu Covalima, Grimaldi de Jesus, Diretor Alfandega Munisípiu Covalima Nuno Noguiera, inklui emprezariu Covalima oan sira.
Jornalista : Julio Salinas
Editor : Chamot Nahac
