Covalima (RCCT) 03-03-24-Prezidente Konsellu Munisipal Kombatentes Libertasaun Nasional Munisipiu Covalima, Ososrio Soares Kodigu Mausoko enkotaza veteranu no inteletual aon sira atu kolabora ho governu lokal halo dezenvolvimentu iha Munisipiu Covalima.
Mausoko mos enkoraza veteranus hotu iha Covalima tenki halo to’os hodi hasa’e produsaun agrikola nune’e bele redus numeru importasaun ain husi rai liur.
“Veteranus sira tenke halo to’os boot kuda modo, kuda hudi, kuda aidila tanba ema barak maka aban bainrua sei mai servisu iha Covalima, bainhira projetu Suai Supply Base la’o ema tenke han, se ita la servisu importasaun kontinua mai nafatin husi rai liur, tan ba ne’e liu husi komemora loron veteranus ba dala hitu nian ne’e, hakarak apela ba maluk veteranu sira hotu tenke kolabora ho governu para hadi’a dezenvolvimentu ne’e di’ak liu ba Timor-Leste liliu ba rai Covalima, husu mos ba intelektual Covalima oan hotu tenke tur hamutuk, tenke hatur unidade metin, kuandu unidade lametin dezenvolvimentu iha Covalima sei la lal’o ho di’ak” dehan Prezidente Konsellu Munisipal Kombatentes Libertasaun Nasional Munisipiu Covalima, Ososrio Soares Kodigu Mausoko, ba RCCT iha resintu Administrasaun Munisipiu Covalima hafoin remata serominia estandarte badeira RDTL ba komemorasaun loron veteranu ba dala 7 iha Munisipiu Covalima, Domingu (03/03).
Mausoko mos lansa nia mensajen ba juventude sira atu labele hatur radikalismu ba oranizasaun arte marsial maibe tenki fokus ba eskola hodi kadi matenek nune’e bele kontribui ba dezenvolvimentu.
“Ha’u nia mensajem ba juventude hotu hotu labele tuir organizasaun arte marsiais demais, tanba involve iha organizasaun ne’e maka halo imi oho malu beibeik, la tempu ona atu oho malu agora tempu atu hala’o dezenvolvimentu, tempu atu estuda, ami jerasaun 1975 katuas hotu ona, ne’e duni husu ba joven hotu hakmatek oinsa ita kaer osan, oinsa ita eskola, agora eskola gratuita kuandu eskola hotu ona halibur malu forma grupo halo proposta mai iha Konsellu Munisipal Kombatentes Libertasaun Nasional Munisipiu Covalima, forma grupo ne’e atu haki’ak fahi ka manu, ne’e governu prontu hela tanba tempu besik ita nia projetu tasi mane Suai Supply Base atu lao daudaun ona” Mausoko dehan.
Entertantu Prezidente Konsellu Munisipal Kombatentes Libertasaun Nasional Munisipiu Covalima, Ososrio Soares “ Mausoko” lansa lai ne’e iha resintu Administrasaun Munisipiu Covalima hafoin remata serominia estandarte Badeira Nasional hodi komemora loron veteranu ba dala 7 iha Munisipiu Covalima, Domingu (03/03).
Jornalista : Julio Salinas
Editor : Chamot Nahac
