Covalima (RCCT) 16-05-23, Prezidente Organizasaun Feto Popular (OFP) Partidu Libertasaun Popular (PLP) Munisipiu Covalima, Maria Noviana de Jesus, husu ba feto maluk sira hotu iha Munisipiu Covalima labele lakon oportunidade maibe tenke prepara an hodi partisipa iha vida politik no ba vida moris ninian.

“Ita nudar feto tenke kapasita an ba vida politik, maibe laos ba vida politik deit, ba vida moris ne’e tenke halo hotu kedas nudar feto ba uma kain nian, nudar feto sai inan ida ne’ebe diak tenke kapasita an hotu” informa Prezidente Organizasaun Feto Popular Partidu Libertasaun Popular (PLP) Munisipiu Covalima, Maria Noviana de Jesus, ba jornalista RCCT hafoin remata fo pose ba estrutura feto Popular PLP nian iha Aldeia Muuk Belis, Suku Labarai, Postu Administrativu Suai, Munisípiu Covalima, Teresa (16/05).

Nia haktuir, nudar feto partisipa iha vida politika tanba baibain ne’e ema dehan feto ne’e sempre monu iha numeru segundu, iha eleisaun ka iha kompetisaun ruma feto ne’e sempre tau ba iha numeru segundu, laos tau ba iha númeru primeiru maibe haree feto mos bele halo buat oi-oin, feto bele halo buat hotu iha kualker situasaun.

Nia afirma feto mos prontu atu bele lidera iha kualker tempu bainhira fo fiar ba feto atu lidera, tanba ho moto balu dehan feto forte nasaun forte, tanba ho feto mak foin mundu ne’e iha no buras.

“Ami feto sira mos prontu atu lidera iha kualker situasaun saida deit, hanesan partisipasaun feto iha vida politik, feto mos bele sai kordenador munisipiu, feto bele sai Vise kordenador munisipiu laos mane hela deit ne’e laiha, feto mos bele, se bainhira nia kapasita an ona, nia prontu ona nia bele lidera iha fatin hotu-hotu” nia hatete.

Maria Noviana de Jesus, esklarese katak bainhira nia parte hanesan Covalima oan ida involve iha PLP ho razaun katak PLP foin harii iha tinan 2017 liu ba foin tama iha Parlamentu haree iha ne’eba partisipasaun feto iha ne’eba menus tebes liliu iha PLP feto kuaze ida ka rua deit maka involve maibe mane maka barak liu.

“Razaun hanesan ne’e iha tinan 2017 PLP foin moris hodi asentu iha parlamentar hau haree partisipasaun feto ne’e menus tebes iha PLP nia laran, feto kuaze iha na’in ida ka rua deit involve mane maka barak, feto laiha liu, atu lao ba mai mos feto menus tebes ho ida ne’e hau involve an maibe iha momentu ne’eba sei dauk hetan kargu ruma husi partidu fo mai hau, maibe hau tuir deit, maibe depois to’o iha ne’eba maka foin estuda loloos katak buat ne’e entre feto ho mane hanesan deit atu ko’alia ka atu lidera iha buat ruma sai hanesan orador feto mos bele” nia esplika.

Nia sublina foin lalais iha konferensia munisipal PLP nian hau (Noviana) mos hotu iha konfrensia, iha momentu ne’eba ami nia pakote maka manan maka to’o ohin loron hau (Noviana) bele dirize belun feto sira iha partidu PLP nia laran liliu iha Munisipiu Covalima.

Nia salienta nudar feto ida kuandu involve iha partidu ida iha mos ambisaun ida hakarak sai hanesan lideransa feto ida iha Munisípiu Covalima ne’ebe di’ak no forte iha PLP nia laran, no hakarak sai lideransa hodi lidera feto maluk sira hatudu katak feto mos bele.

“Kuandu ita tama iha partidu ida iha ambisaun katak hau tama iha ne’eba hau hakarak hanesan ne’e, hau hakarak sai lideransa feto Munisipiu Covalima ida ne’ebe di’ak no forte tebes iha PLP nia laran, hau mos hakarak lidera hau nia feto maluk sira, no tau matan ba feto maluk sira saida maka partidu bele halo ba sira ho razaun ida ne’e maka hau hakarak lori feto maluk sira, bele ajuda sira iha partidu PLP nia laran” nia informa.

Noviana husu ba feto maluk sira iha Munisípiu Covalima atu bele hola partidu politiku hotu lilium ai hamutuk iha PLP atu nune’e bele hetan informasaun ida ne’ebe diak husi partidu ne’ebe feto maluk sira iha Covalima laran tomak involve ba hodi hetan ona informasaun barak tenke fahe tutan ba maluk sira ne’ebe la hola parte iha partidu sira.

Nia mos husu ba feto maluk sira katak bainhira involve ona iha partidu sempre hetan informasaun barak hodi kapasita an di’ak liu tan, tan ne’e nafatin husu feto maluk sira atu involve an iha partidu hotu, tanba feto forte nasaun forte, feto prontu atu lidera iha kualker situasaun.(JS)