Covalima (RCCT) 10-03-24-Ministru Agrikultura Pekuaria Peska no Floresta (MAPPF) Marcos da Cruz sabadu (09/03) fin de semana ne’e ho ekipa tekniku sira inklui Diretór Servisu Munisipal Agrikultura Munisipiu Covalima no Xefe Suku Beko observa irigasaun iha Mota Lomea pertensia ba iha Aldeia Maucola, Suku Beko, Postu Administrativu Suai.
Hafoin halo observasaun ba Irigasaun iha Mota Lo’omea, MAPPF Marcos da Cruz hatete Governu liu husi MAPPF iha dezenu no sei gasta osan bo’ot hod konstrui fali Irigasaun ne’e.
“Irigasaun iha Mota Lomea ohin ita hotu ba haree ona Mota ida ne’ebé bo’ot ne’e presija orsamentu ida ne’ebé bo’ot, ita ministeriu agrikultura iha ona dezenu iha tinan hirak liu ba maibe presija halo revizaun ba dezenu ne’ebé iha ona” dehan Ministru Agrikultura Pekuaria Peska no Floresta (MAPPF) Marcos da Cruz ba Radio Comunidade Cova Taroman iha irigasaun Oebaba.
Governante ne’e funfamenta, iha planu rekonstrusaun ba irigasaun Lo’omea ne’e sei halo mos portaun rua hodi distribui be ba natar iha maukola suku beko no mos suku thasilin postu zumalai.
“Kuandu ita halo irigasaun ne’e, presija halo odamatan rua parte liman loos nian be husi mota bele sulin tama ba kanu hasan Maukola nian no parte liman karuk nian be bele halai tama ba iha Suku Tashilin, Postu Administrativu Zumalai atu nune’e komunidade sira bele uza hotu be hodi halai natar, area rua ne’e kuazè hanesan maibe barak liu area Maucola nian, ne’ebé ida ne’e presija hare ida ne’ebé maka atu bele halo agora” MAPPF Marcos da Cruz dehan.
Entretantu iha loron sabadu finde semana ne’e MAPPF Marcos da Cruz orienta kedas makina eskavator husi Mota Tafara ba iha Maukola hodi hamos kanu hasan ne’ebé liga ba Mota Lo’omea tama ba komunidade sira nia natar.
Jornalista : Julio Salinas
Editor : Chamot Nahac
