Covalima (RCCT) 06-06-23–Ministeriru Agrikultura no Peska liu husi Projetu SAPIP iha Munisipiu Covalima apoiu makina rontok (baku) hare ba grupu agrikultor 9 iha Aldeia Uma Klaran no Aldeia Loro, Suku Raimea, Postu Administrativu Zumalai.

Direitor Serbisu Agrikultura Munispiu Covalima, Reinaldo Monis Coli, iha intervensaun hatete governu tau planu liu ONG SAPIP tau osan sosa makina sira ne’e para apoiu ba povu agrikultor sira hodi hasae produsaun rai laran, tanba Timor-Leste iha mundu nia matan ema moris kiak iha pursentu popreza ne’e iha pursentu 46 no malnutrisaun.

Offisial Projetu SAPIP Munisipiu Covalima Leonito Nascimento hatete iha Suku Raimea rasik total grupu agrikultor hamutuk 26, husi numeru grupu hirak ne’e balu hetan ona apoiu husi hanesan trator, makina rontok no ohin kontinua apoiu tan makina rontok ba grupu agrikultor 9 iha Aldeia Loro no Uma klran.

Enkuantu Xefe Suku Raimea Januario Gomes Nahak, dehan planu governu hakarak atu hasae produsaun iha rai laran hodi redus importasaun husi rai liur maka governu liu husi SAPIP mai apoiu tan makina rontok hare ba grupu agrikultor sira iha fatin ida ne’e, no husu ba grupu atu kuidadu sasan sira ne’e ho diak.

Entertantu total grupu agrikultor iha Suku Raimea hamutuk 26 maibe antes ne’e grupu balu hetan ona apoiu trator no makina rontok hare no ohin governu liu husi SAPIP apoiu tan makina rontok hare 18 no terpal 18 ba grupu agrikulto 9, tanba kada grupu hetan makina rontok hare 2 no terpal rua.