Covalima-RCCT- Komunidade Aldeia Kuna’in Suco Matai, Brisca de Jesus informa nia sente triste tamba iha Aldeia Kuna’in, komunidade hotu uja deit tornera ida, no bee torneira ida ne’e sira uza deit ba konsumu ka uja deit tein no hemu maibe sira labele uja atu hodi fase ropa no nesesidade seluk sira tenki la’o dok husi sira nia Aldeia.
Tanba ne’e Komunidade Brisca de Jesus dehan projeto PNDS fura bee ba sira hanesan promosaun deit tamba sira uza bee sedauk too fulan bomba avaria Total halo sira kontinua halerik ba bee mos .
“Iha tempo udan dala ruma mos bee iha dala ruma mos la iha no iha ami nia aldeia kuna’in iha bee matan ida deit no bee matan ne’e ami uza deit ba hemu baihira ami atu fase ropa ami tenki la’o ho distansia neebe dook,bee nebemak sira (PNDS) bor n’ee hanesa promosi deit ba ami hodi halo ami kontenti iha tempo baluk deit tamba ami uza la to’o semana bomba at ona no agora dadaun ami tenki hein bee loron ho kalan atu kuru bee, at liu mak ami hadau malu bee to hostori malu no trata malu ho lia fuan nebe la merese atu hasai maibe ami simu deit tamba bee la iha ami labele moris ” dehan Brisca ba jornalista RCCT Tersa feira (24 -11-2020)
Tuir sefe aldeia kunain Simão Gusmão esplika, Komunidade sira iha Aldeia Kuna’in Sucu Matai preokupa ba bee mos tamba projeto PNDS ba be’e mos nebe implementa iha sucu Matai Aldeia Kuna’in la iha kualidade tamba uja la to semana ida makinan bomba bee avaria total.
Xefe Aldeia ne’e mos dehan, tempo bailoro komunidade iha Aldeia Kunain, Suco Matai kontinua infreta problema kona ba bee mos, maibe lolos ne’e la halerik liu hanesan kondisaun ida agora, “tanba lolos ne’e ami nia bee di’ak, maibe tanba PNDS implemeta programa bee mos iha ami nia Aldeia no programa ne’e la iha kualidade entaun bee ne’e ami uza la to’o semana bomba avaria kedas”.Dehan Xefe Aldeia Kuna’in Simão Gusmão ba Radio Cova Taroman Tersa feira (24 -11-2020)
Tanba ne’e Xefe Aldeia Simão Gusmão afirma nia parte iha dalan atu hadi’a Bomba bee nebe avaria ne’e, tanba sira rasik halo ona kontribuisaun atu hodi hadi’a bomba refere, maibe komunidade balun nia k’bit sedauk to’o, ho ida ne’e mak ba dadaun ne’e komunidade Kuna’in utiliza bee nebe mak tun mai husi foho maibe bee ne’e menus los, tanba ne’e nia parte husi ba Servisu Agua no Saniamentu (SAS) atu tau matan hodi resolve problema Bee mos nebe komunidade iha aldeia Kuna’in hasoru dadaun ne’e.
“Ha’u iha dalan atu hadi’a bomba Bee nebe avaria ona , tamba komunidade sira halo ona kontribuisaun maibe iha komunidade balu mos sedauk halo kontribuiaun tamba sira nia k’bit seidauk to’o ho ida ne’e oras ne’e dadaun ha’u nia komunidade sira barak mak sei hein hela bee iha be matan neebe mai husi foho maibe bee ne menus tebes, tamba ne’e ha’u husu ba servisu agua saniamento (SAS) atu hare netik ba problema bee mos neebe mak komunidade sira oras ne’e hasoru dadaun iha ha’u nia Aaldeia” Tenik Xefe Aldeia Kuna’in Simão Gusmão
Xefe Aldeia Simão Gusmão mos husu ba SAS Covalima atu labele kontrola deit kanalizasaun Bee nebe Sirkula iha Vila laran maibe tenki halo kontrolu no tau matan mos ba Kanalizaun no bee sira ne’e Bor husi Programa PNDS iha Suco no Aldeia sira hotu.
“Parte SAS labele Kontrola deit Sircula bee iha villa laran maibe mai mos iha aldeia sira ne’ebe mak enfrenta hela problema Bee mos, tamba programa PNDS ida nee mos mai husi governo tamba ne’e husu ba SAS tenki tau matan mai ami tamba durante ne’e SAS la interese Komunidade iha Aldeia ida n’ee ” Tenik Xefe Aldeia Kuna’in Simão Gusmão.
Entertanto liga ho notisia ne’e, wainhira Jornalísta RCCT halo konfirmasaun ho Servisu Agua no Saneamentu,Diretur Servisu Agua no Saneamento (SAS) Moses Visente deklara iha nia knar fatin Quinta Feira 26-11-20), parte husi SAS labele halo buat ida tamba, antes PNDS implementa Programa ne’e PNDS La halo kordenasaun ho parte Servisu Agua Saneamento-Covalima. Diretur Moises Visente hakotu.
Iha fatin seluk Cordenadora PNDS Municipio Covalima Zelia Freitas da Conseição relata ba Jornalista RCCT katak, Tuir mata dalan PNDS katak obra ne’ebe maka etrega ona ba autoridade Sucu, ida ne’e Autoridade sira iha Suku maka tenke iha responsabilidade oinsa atu bele kuidado.
“ Tuir mata dalan PNDS katak obra ne’ebe maka finaliza ona ami entrega ona, ida ne’e siknifika responsabilidade autoridade suku nian, karik buat ruma failha pronto apoio tekniku, maibe responsabilidade ba servisu PNDS la iha ona orsamento atu hadia, karik komunidade sira hakarak halo kontribuisaun hodi hadia fali, ami prontu apoio tekniku ” Dehan Coordenador PNDS iha nia knar fatin (26-11-2020)
Jornalista : Tynho Gusmão
Editor : Chamot Nahac
