Covalima (RCCT) 20-03-24-Responsavel Fokupers iha Munisipiu Covalima, Maria Madalena do Carmo hatete Prezensa Organizasaun Noun Governamentais (ONG) Hamutuk Nasaun Saudavel (HAMNASA) iha Covalima bele haforsa tan servisu rede referal hodi tau hanoin no apoiu malu hodi hare konaba Violensia Bazeia ba Jeneru (VBJ).
Maria Madalena do Carmo, hateten programa no politika tau matan ba vitima violensia bazeia ba jeneru ne’e foku liu ba iha kaben sedu.
“Ami iha ne’e servisu paseria ho rede referal iha Munisipiu Covalima ne’ebé ho prezensa ONG HAMNASA nian ami orgullu tanba bele mai haforsa tan servisu rede ne’ebé durante ne’e la’o ona iha Munisipiu Covalima, sira mai lori mos sira nia programa ho politika ida katak atu hare liu ba vitima violensia bazeia ba jeneru maibe hare liu ba iha kaben sedu nia impaktu ba iha orgaun reprodutivu, membru rede hotu iha Munisipiu Covalima ne’e halo hotu sosializasaun konaba violensia bazeia ba jeneru, igualdade jeneru no buat barak maka ami halo sosialisasi iha postu administrativu 7 ne’e, maibe ho prezensa ONG HAMNASA nian mai atu haforsa liu tan, no ami sujere prefere liu ba iha kaben sedu” dehan Responsavel Oragnizasaun Fokupers Munisipiu Covalima, Maria Madalena do Carmo, ba RCCT hafoin partisipa iha Aprezentasaun Prgorama Hakotuk Bareira, hari Moris di’ak hodi responde integradu Violensia Bazeia ba Jeneru ne’ebé hala’o husi ONG HAMNASA iha Salaun enkontru Administrasaun Postu Administrativu Suai Tersa (19/03).
Nia haktuir feto barak forma uma kain sedu kontribui ba Malnutrisaun fo impaktu ba iha bebe, nia mos dehan daudaun iha Covalima numeru malnutrisaun as tebes.
“Ami prefere liu ba iha kaben sedu tanba impaktu husi kaben sedu halo ita nia feto maluk barak sofre mos ho malnutrisaun nia impaktu ne’e bele to’o iha bebe halo labarik mos sai malnutrisaun, ita haree iha Covalima mos malnutrisaun sae as liu, hein katak ho sira nia prezensa mai bele redus ona numeru malnutrisaun, liliu servisu hamutuk ho parte saude nian” nia dehan.
Entertantu Responsavel Oragnizasaun Fokupers Munisipiu Covalima, Maria Madalena do Carmo, sujere ba oin rede referal Covalima hamutuk ho ONG sira hotu ne’ebé servisu ba iha asuntu violensia bazeia ba jeneru presija halo sosialisasi masimu ba to’o iha nível aldeia.
Editor : Chamot Nahac
