Covalima (RCCT) 14-05-24-Ministeriu Asuntu Kombatentes Libertasaun Nasionál (MACLN) hahu formasaun ba nurep suku sira molok halo publikasaun konaba uma lisan no matebian sira ne’ebé mate iha funu laran husi 1975-1999.
Xefe Ekipa Verifikasaun no Validasaun Uma Lisan Munisipiu Covalima, José das Dores, hatete programa ida ne’e hanesan faze primeiru husi Ministeriu Asuntu Kombatentes Libertasaun Nasionál ne’ebé hahu uluk husi Postu Administrativu Suai.
“ita hahu husi postu administrativu Suai, tuir planu la’os postu ida ne’e deit maibe ita sei kobre hotu postu sira iha Covalima laran tomak, objetivu husi formasaun ne’e atu iha konesimentu ba sira kona ba visa sira ne’ebé ita sei halo valida iha tempu ne’eba maizumenus nia lalaok ne’e bele iha koñesimentu, ita mos sei fahe lista matebian kada suku no aldeia sira depois maka sira sei taka iha aldeia no suku, depois hotu sira iha baze katuas uma lisan sira ho mos aldeia sira bele apar didi’ak matebian sira ne’ebé rejista iha 2021 para ikus liu ita valida iha fulan Junhu mai” dehan Xefe Ekipa Verifikasaun no Validasaun Uma Lisan Munisipiu Covalima, José das Dores, ba jornalista sira hafoin remata fo formasaun ba nurep sira ne’ebé hala’o iha Salaun enkontru Postu Administrativu Suai.
Sikun seluk Sekretariu Nurep Suku Labarai, Oscar Amaral, konsidera formasaun ne’e importante tanba komesa iha fulan juñu nia laran hahu hala’o ona validasaun dadus ba matebian no uma lisan sira. Nia mos relata tuir dadaus uma lisan hamotuk 84 ho Matebean na’in 768 mak rejista ona suku labarai.
“Suku Labaraik, iha total uma lisan 84, total ema mate 768, ida ne’e fo tempu durante fulan ida halo ami ba aldeia taka lista hirak ne’e, ba konfirma uma lisan hirak ne’e hodi hein data validasaun ne’ebé maka akontese iha dia 10-12 de junhu nia laran.” Oscar dehan.
Entertantu, Formasaun ne’e realiza iha salaun administrasaun postu Administrativu Suai, ne’ebe partisipa husi pontu fokal suku Ministeriu Asuntu Kombatentes Libertasaun Nasionál (MACLN Nurep sira iha postu Suai, hamotuk ema na’in 15.
Jornalista : Julio Salinas
Editor : Chamot Nahac
