Tan ne’e Xefe Grupu Hali Sarin, Lucio da Costa husu Autoridade sira no governu nasional atu apoiu buka buka dalan ba sira lori produtu lokal asesu ba merkadoria.

“Ami husu ba governu buka netik dalan ida mai ami atu bele lori tomati ne’e ba fa’an, ami iha ona produtu lokal maibe susar maka atu asesu ba merkadoria” dehan Xefe Grupu Hali Sarin, Lucio da Costa (27/05)

Administrador Postu Administrativu Fatumea Sejar Madeira apresia ba komunidade sira ne’ebé iha inisiativa haki’ak tomati kuaze rihun 10 resin ne’ebé hatudu ona rezultadu di’ak, tan ne’e hanesan autoridade prontu buka dalan hodi hetan merkaduria ba komunidade sira bele fa’an sira nia produtu.

“Apresia ba inisiativa komunidade sira ne’ebé mesmu iha grupu ki’ik maibe sira iha inisiativa ona atu bele halo produtu rasik liliu hanesan tomati ne’ebé iha hun rihun 10 ne’e, kuaze uza rai hektares 3 hanesan ne’e, ida ne’e inisiativa kapas loos, sira nia rezultadu komesa iha no komesa panen (koileta) maibe sira preokupa maka oinsa atu ba fa’an ne’e, ita hare ba iha programa merenda eskola iha ita nia rejimentu bandu ita labele sosa produtu fabrikanu nian liliu hanesan sosis, ayam potong ne’e bandu, ita nia rejimentu ne’e prefere liu estudante sira iha eskola konsumu ai han lokal, maibe ha’u hein to’os na’in sira atu bele mai komunika ho ami para ha’u mos bele komunika ona ho diretor eskola bazika fatin rua iha Fatumea nune’e ita bele hatene total nesesidade ne’ebé maka ita nia alunus oan sira ne’e presija ba sira nia merenda eskolar, ita prontu ba kordena ho diretor eskola sira para produtu lokal hanesan tomati ne’e bele fa’an mos ba iha programa merenda eskolar, la’os tomati de’it komunidade balu mos agora atu tama ona ba tempu bai loro sira mos komesa halo produtu ba iha kuda modo ne’e mos ita tau prioridade, tanba produtu ne’e iha ona labele husik hela produtu sira seluk ita hakarak tau hotu prioridade saida maka komunidade produs” informa APA Fatumea.

Nune’e Administrador Postu Administrativu Fatumea, Sejar Madeira kompromete sei buka dalan ba to’os na’in sira bainhira produs ona produtu lokal husi to’os laran hodi fa’an ba iha programa merenda eskola.

Jornalista : Julio Salinas

Editor       : Chamot Nahac