Covalima (RCCT) 04-04-24-Xefe Aldeia Salele Bo’ot, Teofilo de Araujo, hatete idetifika ona rai ba planu atu harii bairo foun maibe tenki loke uluk dalan tanba fatin ne’ebé identifikadu dook husi Aldeia kuaze kilometru ida resin.

Teofilo relata, iha loron 18 fulan janeiru 2024, realiza ona sorumutu ho komunidade sira, liu liu katuas lia na’i,n juventude feto no mane, intelektual oan sira iha aldeia laran, ne’ebé hotu-hotu konkorda hakarak harii bairu foun, ho objetivu atu hafahe Familia xefe familia sira ne’ebé durante hela hamotuk iha uma kain ida liu familia rua to’o tolu.

“Iha aldeia ida ne’e mos ami iha planu atu loke dalan hodi harii bairu foun ba rai kilometru ida resin, ami nia planu loke dalan hodi harii bairu foun ne’e tanba durante ne’e tuir ha’u nia hare kada uma ka’in ida iha familia rua, tolu maka hela hamutuk, tan ida ne’e nudar autoridade lokal iha planu atu loke dalan hodi harii bairu foun, ami iha ne’e halo ona enkontru ho intelektual, katuas lian na’in no joven sira hotu, komunidade feto no mane tantu ema ki’ik ka ema bo’ot hotu-hotu partisipa, sira mos hotu-hotu konkorda katak primeiru tenke loke uluk dalan nune’e foin bele harii bairu foun, rai kilo metru ida resin ne’e maioria komunidade nia rai, liu husi enkontru ne’e komunidade hotu konkorda katak bainhira loke dalan hotu iha estrada sorin-sorin komnudade sira na’in rasik maka sei harii uma tuir ida-idak nia rai ne’ebé sira oferese hodi loke estrada nune’e hodi haketak familia rua to’o tolu hamutuk iha uma kain ida” dehan Xefe Aldeia Salele Boot, Teofilo de Araujo, ba RCCT iha Aldeia Salele Boot Kuarta (03/04).

Komunidade Aldeia Salele Boot, Luis Amaral Lopez, dehan planu loke bairu foun ne’e hotu-hotu konkorda tanba liu husi enkontru entre autoridade lokal ho komunidade tomak.

“Planu loke dalan no harii bairu foun hanesan ne’e, ami katuas sira, xefe aldeia, xefe suku ami tuur hamutuk ona, ami ko’alia atu la loke bairu foun maibe tanba haree ba keluarga foun foun hola malu ne’e tama hamutuk iha uma kain ida dala ruma iha uma kain ida bele familia rua to’o tolu, atu halo uma mais fatin laiha ne’e maka ami tuur hamutuk hodi deside loke netin dalan hodi hari bairu foun ida ba sira keluarga foun, tan ne’e husu tulu mos ba governu atu bele ajuda hodi apoiu makina ba komunidade bainhira realiza loke dalan ba harii bairu foun ne’ebé sei uza rai kilomrtru ida resin ne’e” nia haktuir.

Entertantu liu husi enkontru ne’ebé realiza husi xefe aldeia Salele Bo’ot ne’e, komunidade hotu konkorda tau planu hahu servisu loke dalan iha tinan 2025, bainhira loke dalan hotu ona maka foin planu komunidade ida idak harii uma iha nia rain.

Jornalista : Julio Salinas/Moichung

Editor : Chamot Nahac