Covalima (RCCT) 22-08-24- Autoridade Komunitariu suku Belekasak kompromete sei esforsu halo proposta ba governu liliu ba iha ministeriu relevante sira oinsa atu bele fo tulun hodi dada eletrisidade liña Eletrisidade no dada bee mos ba komunidade sira ne’ebe durante ne’e seidauk asesu ba iha fasilidade infraestrutura hirak ne’e.

Xefe Suku Belekasak, Leonito Gusmão hateten, Suku Belekasak kompostu husi aldeia 7, iha Postu Administrativu Maukatar maibe iha aldeia 6 maka asesu ona ba iha fasilidade publiku liliu hanesan eletrisidade ho bee mos so uniku iha aldeia Gazolo maka komunidade sei dauk asesu ba iha infrastrutura baziku hanesan estrada, eletrisidade no bee mos.

“Suku Belekasak iha Aldeia 7 hanesan Aldeia Dais, Loloa, Gazolo, Ila, Du’ut, Loloba no Aldeia Busa Dão, husi aldeia 7 ne’e iha aldeia 6 maka asesu ona ba iha eletrisidade no bee moos, maibe iha Aldeia Gazolo maka sei dauk asesu ba iha lina eletrisidade, maibe husi parte tekniku EDTL ba halo ona instalasaun no sira dehan orsamentu lato’o tan ne’e maka komunidade sira ne’ebe forma uma kain foun atu harii uma iha parte ligasaun aldeia refere labele asesu lina eletrisidade tanba ahi laiha ho bee laiha, maibe hau hanesan xefe suku iha planu ona prepara proposta no sei kordena ho parte ministeriu relevante oinsa maka hau nia povu sira la asesu lina eletrisidade ho bee moos bele asesu hotu” dehan Xefe Suku Belekasak dehan Suku Belekasak ba jornalista sira iha nia kna’ar fatin.

Leonito haktuir  kona ba estrada ligagu ba iha aldeia 7 laiha problema tanba iha hela faze konstrui husi governu, nune’e mos komunidade iha Aldeia Gazolo hela iha situasaun ameasa nia laran husi mota Rai Ketan tanba laiha buat ida atu hodi satan netik bee bainhira akontese udan halo korente mota maka’as bele tama ba iha komunidade nia hela fatin.

“Estrada iha Suku Belekasak liga ba iha aldeia 7 oras ne’e daudaun governu konstrui hela laiha problema tuir planu Dezembru tinan ne’e tenke remata, kona ba eletrisidade iha aldeia 7 so iha Aldeia Gazolo maka instalasaun sei dauk hotu tuir planu tinan ne’e mos ita prepara proposta ruma ba Aldeia Gazolo tenke remata, bee mos ba aldeia 7 ne’e loloos instala hotu ona maibe iha tinan kotuk akontese udan bo’ot maka iha Aldeia Ila agora daudaun bee moos laiha ona tanba udan maka’as halo rai halai hodi estraga kanalizasaun halo komunidade iha Ila labele asesu ba bee maibe hau hanesan autoridade prepara ona proposta no iha ona informasaun katak tinan ne’e atu konstrui, iha fatin seluk bainhira akontese udan hamosu inundasaun karik korente Mota Rai Ketan bo’ot fo ameasa tebes ba iha komunidade Aldeia Gazolo liliu sub Aldeia Has Ain maibe ida ne’e mos proposta tama ona ba iha governu liu husi Ministru Obras Pubalika  vizita dala rua ona hodi haree ho matan ne’ebe garantia katak iha tinan ida ne’e ou tinan oin bele ona bronjong iha mota ninin nune’e mota tun karik labele tama hodi ameasa ba iha komunidade sira iha Aldeia Gazolo” nia dehan.

Entertantu Suku Belekasak kompostu husi aldeia 7, hanesan Aldeia Dais, Loloa, Gazolo, Loloba, Ila, Du’ut no Aldeia Busa Dão, total familia uma kain 860 resin, total populasaun feto ho mane hamutuk ema na’in-3.060 resin.

Jornalista : Julio Salinas

Editor      : Chamot Nahac