Covalima (RCCT) 28-04-25-Politika Governu hari Jardim ba Erroi sira iha Suku Belekasak, Postu Administrativu Maukatar, ne’ebé tuir markasaun no identifikasaun rai lokaliza Area Rumah Sangat Sederhana (RSS) iha Aldeia Dais.
Maibe Xefe Suku Belekasak, Leonito Gusmão, husu governu atu trata ho dignu ba komunidade sira ne’ebé durante ne’e okupa fatin refere.
“Hanesan autoridade ita tenke kopera ho governu Timor-Leste, liliu ba fatin ne’ebé governu konsidera no iha okupasaun Indonezia fatin ida ne’e ema temi RSS, governu Timor-Leste maka toma atensaun, se governu atu uza rai ida ne’e, governu mos prepara kondisaun balu no komunidade na’in hira maka hela iha ne’e, liliu kopera ho Sekretaria Estadu Veteranu, ohin mos ami ko’alia ona kona ba area ne’ebé governu atu utiliza sira sei konsidera komunidade ne’ebé durante ne’e hela iha area refere” informa Xefe Suku Belekasak Leonito Gusmão.
Xefe suku subliña katak komunidade labele duvida konaba governu hakarak utiliza rai hodi harii Jardim dos Herois.
“Sira labele duvida tenki kopera tanba ita nia governu atu tau Jardim dos Herois, povu ne’ebé durante ne’e hela area estadu ka uma RSS ne’e nia dalan ita iha hela. Ita kopera ho terras Munisipiu Covalima no oinsa atu sira hetan sira nia direitu karik durante sira utiliza hela rai ne’ebé konsidera rai estadu” nia dehan
Enkuantu rai ne’ebé atu utiliza ba iha harii Jardim dos Herois ne’ebé governu liu husi Sekretaria Estadu Veteranu, Autoridade Munisipiu Covalima no Terras Munisipiu Covalima hahu iha loron sexta foin lalais ne’e tun ba iha terenu hodi halo ona levantamentu dadus no konsege sukat ona rai kuaze hetakres 10 iha Aldeia Dais, Suku Belekasak, Postu Administrativu Maukatar.
Jornalista : Julio Salinas
Editor : Chamot Nahac
