Nune’e Administrador Postu Administrativu Maukatar, Laurentinho de Jesus, dehan planu prioridade 3 ne’e maka sei aprezenta Konsellu Konsultivu Munisipal (CCM).
“Hafoin ami taes iha nivel postu foin lori mai aprezenta iha CCM, prioridade ne’ebé momentu iha reuniaun ASPA ne’e suku sira mai ho planu prioridade-9, maibe ami deside ida ne’ebé mais importante, ida ne’ebé atu bele halo asaun ba komunidadeiha area rural, ne’ebé ba ida ne’e maka ba suku balu planu prioridade maka halo barajen kuaze metru 450 iha Aldeia Foho Rua, Suku Ogues, ida halo konstrusaun ba Postu Saude iha Suku Matai, tanba hare husi komunidade ne’ebé halo tratamentu liliu ba inan isin rua kondisaun uma ladun di’ak ba sira maka presija mos aumenta halo konstrusaun ba postu saude, planu prioridade ida seluk ne’e ba iha viveirus, halo fatin viveirus ka haki’ak ai oan iha Suku Belekasak, Aldeia Busa Da’o ne’e atu responde ba iha klamidade ka erosaun ne’ebé durante akontese iha tempu udan monu rai, atu nune’e ita bele responde iha bainhira akontese” dehan APA Maukatar ba RCCT Tersa (19/03).
APA Maukatar afirma konaba barajen ne’ebé atu implementa Suku Ogues ne’e sei halo hodi satan rai ne’ebe kada tinan wainhira udan halo rai halai afeta ba komunidade nia uma hela fatin.
“Planu pripridade konaba atu tau barajeng iha Suku Ogues ne’e mai ho modelu halo bronjong atu nune’e bele halo hodi hatos rai ne’ebé ita la espera katak kada tinan udan bo’ot sempre halo rai halai hodi afeta mos ba iha komunidade nia uma” nia dehan.
Entertantu planu prioridade ba Postu Administrativu Maukatar maka planu prioridade 3 hanesan konstrusaun ba barajeng iha Suku Ogues, haki’ak ai oan iha Aldeia Busa Dão, Suku Belekasak no ida seluk halo konstrusaun postu Saude iha Suku Matai, no planu priorudade hirak ne’e husi postu sei aprezenta ba iha Konsellu Konsultivu Munisipal (CCM).
Jornalista : Julio Salinas
Editor : Chamot Nahac
