.png)
Empozadu Administrador Postu Administrativu Maukatar, Laurentino de Jesus, dehan sai lideransa la’os atu servisu mesak maibe tenke involve ema hotu atu fo kontribuisaun ba dezenvolvimentu.
“Loron ida ne’e simu kna’ar nudar Administrador Postu Administrativu Maucatar no ohin mos simu ona pose ker dizer hatudu katak dezenvolvimentu iha Maukatar sei la’o ba oin maka laos hau mesak, ha’u sei halibur sosiedade sivil, juventude intelektuais, igreja, veteranu sira hotu para oinsa lori dezenvolvimentu ne’e la’o ba oin, ne’ebé planu ne’e la’os ha’u mesak maibe sei halibur matenek oan iha Postu Maukatar atu mai hamutuk para halo planu hamutuk, hanoin hamutuk hodi kontribui dezenvolvimentu ba Postu Maukatar bele la’o ba oin, dezenvolvimentu ne’e tuir ha’u nia prespetiva haree liu ba estrada. Saude bee moos tanba ne’e importante loro-loron povu halerik beibeik katak saude, edukasaun ne’e importante, ida ne’e mosh au sei teu prioridade primeiru durante iha hau nia mandatu ida ne’e iha Maukatar” nia dehan.
.png)
Nune’e mos Empozadu Sekretariu Munisipal Administrasaun no Finansas Munisipiu Covalima Alberto Moniz de Araujo, maske Covalima seidauk iha Prezidente Autoridade Munisipiu (PAM) maibe ho Sekretariu Munisipiu na’in tolu no Diretor Servisu Munisipal inklui administrador postu sira sei mantein hala’o k’nar hodi hein desizaun Primeiru Ministru Kay Rala Xanana Gusmão konaba Prezidentu Autridade.
“Ohin marka istoria foun ida ba iha Covalima katak governu iha inisiativa di’ak liliu husi Ministeriu Administrasaun Estatal halo ona tomada de pose ba sekretariu munisipiu na’in-3, diretores munisipais nain-18 no administrador postu administrativu na’in-7, maske ita Covalima seidauk iha Prezidente Autoridade Munisipiu (PAM), maibe komesa ohin ba oin ita hodi hein prosesu nomeasaun Primeiru Ministru atu hili se se ita hein, maibe ohin ba oin sekretariu munisipiu na’in-3 sei hala’o kna’ar ida ne’e hodi hein desizaun husi Primeiru Ministru atu nomea se sai Prezidente Autoridade Munisipiu Covalima” nia dehan.
Vise Ministru Administrasaun Estatal (MAE) Jacinto Rigoberto Gomes de Deus, hatete Administrador Postu Administrativu maka sai responsabilidade ba servisu extensaun ba autoridade munisipal hodi tau matan no hadi’a povu nia moris.
“Administrador postu administrativu nudar servisu extensaun autoridade munisipal nian, xefia husi administrador postu administrativu tanba nudar responsavel ba servisu ida ne’e no ba servisu lokal sira tuir hirarkia Prezidente Autoridade Munisipiu (PAM) ho nia kna’ar no hodi asegura ezekusaun kompetensia espesifika iha area postu administrativu ne’e garante aprosimasaun no hakbesik an efektivu servisu administrasaun ba ba populasaun no promove sidadaun sira nia partisipasaun boot ba atividades administrativa sira iha administrasaun publiku no iha sistema demokratiku, ;iu husi desentralizasaun autoridade munisipais hetan autonomia boot para bele dirije ona rekursu no dezenvolve politika espesifika ba area sira ladun dezenvolve iha ninia teritoriu laran, hodi promove igualdade oportunidade ba ema hotu, ne’e ita boot sira rasik maka hatene iha imi nia suku, postu povu nia susar e’e iha bairru ida ne’ebe, iha aldeia ida ne’ebe ita boot sira maka define no ita boot sira rasik maka sei responde, tan ne’e governu sentral agora fo hela ba ita boot sira para atu prepara kondisaun hodi nune’e Covalima bainhira govewrnu sentral deside tama ba eleisaun kamra munisipal Covalima mos tenke foti oin no basa hirus matan katak ami mos preparadu atu kompete ba eleisaun kamra munisipiu” Vise MAE hateten.
Entertantu Vise Ministru Administrasaun Estatal (MAE) Jacinto Rigoberto Gomes de Deus, Tersa feira (06/02) ne’e fo deit pose ba sekretariu munisipiu na’in-3, Diretores Servisu Munisipais nain 18 no Administrador Postu Administrativu na’in-7, maibe ba prezidente autoridade munisipiu Covalima sei hein desizaun husi Primeiru Ministru Kay Rala Xanana Gusmão konaba nomeasaun ba PAM Covalima.
Jornalista : Julio Salinas
