Covalima (RCCT)- 01-02-21 Relasiona ho Informasaun nebe maka espalla iha media social kona ba Sidadaun stranjeiru nain 2 nebe aferadu ba Covid-19 tenta atu tama mai timor leste liu husi Postu Administrativu Fatululic tanba Fronteira besik liu Lakmaras, Atambua Indonesia, Xefe Suco Taroman konsidera informasaun ne’e lalos.
Kasu lia ba RCCT, Xefe Taroman Leonel Asa dehan, Durante Estadu Emerjensia (EE) Komunidade ho Lideransa Lokal iha Postu Fatululic iha koperasaun nebe diak relasiona ho Prevensaun Covid-19, liliu Informa kedas ba Parte Kompotente wainhira hasoru ema ruma nebe tama Ilegal husi Indonesia mai iha Area Timor Leste ninian.
“Informasaun ami rona katak dehan iha ami nia posto ne’e komunidade sira subar ema nebe tama mai husi sorin, maibe durante situasaun Covid 19, ami nunka subar ema ruma, bainhira sira mai husi sorin, karik ami kesar kedas ba saude no polisia sira, entaun dehan iha ema nebe husi sorin tama mai ne’e informasaun sei la lo’os.” Dehan Sefe Suku Taroman Leonel Assai ha Aldeia Fatuloro, Segunda Feira (01-01-21).
Tanba ne’e Xefe Suco Leonel Assa husu ba Publiku sira, labele hafoer Posto Fatululik nia naran, Tamba maske Posto Fatululik Pertense iha Linha Fronteira maibe Komunidade sira iha Posto refere mos assegura sira nia an husi Covid-19 nune’e moras Covid 19 labele tama mai nasaun Timor Leste.
“ Nu’udar Autoridade Lokal iha suku Taroman Posto Fatululik, husu ba sidadaun hotu iha timor laran, liliu ba Publiku sira nebe asesu media social, atu la bele Paniku ho informasaun nebe lalos, no la bele hafoer Posto Fatulik nia naran.”Tenik Leonel
Xefe Suco Leonel mos dehan iha postu fatululik mos halo rasik siguransa ba sira nia aan hodi salva daet covid-19.
“tamba ami Autoridade Lokal hamutuk ho ami nia komunidade sira iha ne’e, ami mos seguransa ba ami nia an, atu nune’e ema husi sorin (indoneisa) labele tama ilegal mai iha ami nia Posto ida ne’e ” Tenik Leonel Asa Xefe Suco Taroman.
Entertanto Xefe Suco Taroman Leonel Assa mos Afirma Deklara, Durante ne’e Autoridade Lokal servisu hamutuk ho Seguransa sira hanesan Polisia UPF no F-FDTL ne’ebe destaka iha Fronteira Posto Fatululik, hodi assegura Linha Fronteira, atu nune’e moras Covid 19 labele tama mai Nasaun Timor Leste, no nia promesa, bainhira ema ruma hakat husi Linha Fronteira, sira nia parte sei kontaktu ba ekipa Saúde sira atu nune’e bele hatama sidadaun refere ba iha Quarentina.
Jornalísta : Tynho Gusmão
Editor : Chamot Nahac
