Covalima (RCCT) 29-10-23-Tuir Observador Postu Administrativu Suai, Augosto Borges hatete, eleisaun orgaun suku ba periudu 2023-2030 hamosu konfuzaun ba eleitores sira hodi fo vota barak liu nulu no branku tamba iha buletin votus laiha fotografia ba kandidatura aldeia, delegada no delgado.
Augosto Borges informa lala’’ok eleisaun Suku tinan ida ne’e kontinua uza sistema manual no haree ba kandidatura aldeia, delegada no delgado nia fotografia iha buletin votus maka ikus mai eleisaun remata votu barak mak nulu ho branku iha sentru votasaun sira.
“Tuir observasaun hanesan ema onservador husi Postu Administrativu Suai nian haree lalaok ne’e diak, maibe presija uitoan ba oin liliu ba iha buletin votus ida ne’e mak hau observa presija tau mos fotografia ba kandidatura aldeia, delegada no delgado, maioria komunidade ka eleitor ne’e la hatene lee, halo sira arbiru tan ne’e ita haree daudauk iha buletin votus hetan nulu no branku barak liu maka mosu iha sentru votasaun sira” informa Observador Postu Administrativu Suai Augosto Borges ba jornalista RCCT iha Sede Suku Kamanasa Domingu ne’e.
Observador ne’e husu ba orgaun tekniku hanesan STAE no CNE atu hadi’a di’ak liu tan sistema relasiona ho eleisaun ba orgaun suku nian.
“Ho eleisaun suku foin daudauk ita haree iha bulletin votus mosu nulu no branku barak tanba ne’e sujere ba oin atu bele hadi’a di’ak liu tan atu nune’e labele akontese iha eleisaun suku tuir mai” nia dehan.
Kandidatura Suku Kamanasa Fernando Noronha, hatete ho eleisaun suku foin daudaun ne’e la’o ladun di’ak tanba komunidade sira, liliu ferik ho katuas barak mak preokupa liu ho buletin votu ba kandidatura aldeia, delegada no delgado tanba laiha fotografia.
“Ita haree ba eleisaun iha 28 de Outobru 2023 ne’e halo ami sente ladi’ak liliu ba ami nia komunidade ferik ho katuas sira ne’ebé le’e la hatene liliu ba xefe aldeia, delegada no delgado laiha fotografia iha buletin votus hodi akontese mosu nulu no branku barak liu tan ne’e husu ba governu liliu ba STAE ho CNE atu hadi’a sistema ida ne’e” nia dehan.
Nia afirma konaba kandidatura xefe suku laiha problema ba ferik ho katuas sira tanba buletin votus iha fotografia kandidatura suku nian.
“Kona-ba buletin votus kandidatura suku nian ida ne’e sira la duvidas tanba iha fotografia” nia hatete.
Kandidatura Suku Kamanasa Rosito de Araujo Monis, husu ba orgaun eleiroral no governu atu hadi’a sistema tanba ho eleisaun oragaun Suku nune’e hamosu konfuzaun bo’ot ba eleitor sira liliu ferik ho katuas sira duvida ba buletin votus kandidatura aldeia, delegada no delgado iha buletin votus laiha fotografia ikus mai mosu nulu no branku barak iha sentru votasaun hotu.
Ha’u sujere deit ba governu liliu ba orgaun tekniku kompetente sira hanesan STAE no CNE atu bele hadi’a sistema ida ne’e tanba komunidade barak ladun hatene lee no hakerek ikus mai mosu nulu no branku barak” nia dehan.
Entertantu relasiona ho eleisaun suku iha Suku Kamanasa total eleitores iha aldeia 4 hamutuk ema na’in-3079, total eleitor tuir vota 2123, total nulu 70 no total branku 23.
Jornalista : Julio Salinas
Editor : Chamot Nahac
