Covalima (RCCT) 12-07-24-Asesor Prinsipal Asuntu Inkluzaun Sosial Gabinete Prezidente Republika, Gaspar Afonso, kompromete sei ko’alia ho Prezidente Republika, atu bele kore terus no susar Ema ho Difisiensia (EhD) husi pobreza ne’ebé durante ne’e sira infrenta.
Gaspar Afonso, hatete hafoin rona informasaun husi autoridade lokal sira konaba difikuldade ne’ebé ema ho difisiensia sira hasoru, liliu konaba hela fatin, han la to’o no dala ruma hasoru diskriminasaun husi sosiedade sira.
“Ita rona konversa ho autoridade lokal sira katak nai asesor oinsa se lori hahan de’it ita labele rezolve difikuldade moris ema ho difisiensia nian, maiz menus bele halo netik uma mahon ida ka uma dignu ida ba ema ho difisiensia, no lia fuan hirak ne’e, preokupasaun hirak ne’e soke tebes ha’u nia fuan, ha’u hanesan ema defensor direitus humanus ba ema ho difisiensia, ativista ba ema ho difisiensia ne’e sente sokadu tanba ita tinan-tinan aprova orsamentu iha parlamentu ho montante billaun $ 1.8 no $1.9 maibe ema ho difisiensia nafatin hela iha kotuk, EhD nafatin moris iha pobreza nia laran ida ne’e ba ha’u sei ko’alia maka’as ba nai prezidente republika hato’o ba Primeiru Ministru atu hare situasaun sira ne’e ho seriu, la’os halimar maibe ho seriu atu nune’e EhD sira nia moris bele kore husi pobreza intermu de setor oi-oin, tanba EhD barak maka loron ida bele han dala ida de’it no dala ruma la han tan, roupa mos dala ruma sira laiha, inklui uma mos dala ruma laiha no la asesu ba be mos” dehan Asesor Prinsipal Asuntu Inkluzaun Sosial Gabinete Prezidente Republika, Gaspar Afonso, ba jornalista sira hafoin distribui ai han ba EhD sira iha Sede Suku Kamanasa. Kuarta (10/07) foin lalais.
Gaspar Afonso, husu ba entidades hotu labele halo diskriminasaun hasoru ema ho difisiensia, konsidera sira iha diretu hanesan ho ema ho kodisaun normal.
“Husu ba autoridade lokal, familia inan no aman ne’ebé maka iha membru ka iha oan moris ho difisiensia favor ida dala ida tan labele halo diskriminasaun hasoru sira tanba sira mos ema hanesan ita bo’ot sira, tanba EhD mos kriasaun maromak nian, buat ida difisiensia ne’e la’os ami maka husu, la’os ami maka hakarak maibe ida ne’e situasaun ho kondisaun ida ne’e desizaun, se husu ami atu hili karik ami mos lakohi sai ema ho difisiensia, maibe fo ona mai ami simu ho liman rua, maibe ami hakarak nafatin ejiji tanba ami EhD iha direitu konsagra ona iha konstituisaun RDTL artigu 21, no ita nia artigu fundamental artigu 16 igualdade universal, alinea primeiru ema hotu iha direitu hanesan, alinea segundu halo tratamentu la haree ba rasa, kor, etniku, fiziku mental, ida ne’e maka ha’u sei nafatin ajiji ba entidade hotu, ba ukun nain hotu-hotu atu tau atensaun no toma ho seriu ba ema ho difisiensia iha Timor laran” nia dehan.
Asesor Prinsipal Asuntu Inkluzaun Sosial Gabinete Prezidente Republika, Gaspar Afonso, kompromete sei hato’o direita ho Prezidente Republika atu bele ko’alia ho Primeiru Ministru atu bele preve orsamentu hodi atende ema ho difisiensia ho dignu.
Jornalista : Julio Salina
Editor : Chamot Nahac
