Covalima (RCCT) 03-10-23—Xefe Suku Taroman, Leonel Asa hateten konstrusaun Uma Naroman ba Povu (UNP) husi programa Planu Nasional dezenvolvimentu Suku (PNDS) iha Taroman bele la’o maibe konstrui sei la tuir dezeñu basa Nonu Governu hapara ona Funsionariu PDNS sira mak destaka iha Postu Fatululik.

Xefe Suku Leonel Asa ba jornalista sira Sabadu foin lalais (30/09) konsidera governu fakar osan barak hodi harii uma naroman ba povu maibe realidade hatudu iha Suku Taroman, Postu Administrativu Fatululik Konstrusaun bele la’o maibe la tuir dezeñu tanba laiha ona tekniku PNDS nian atu halo ona kontrollu.

“Programa PNDS ne’e di’ak tanba atu bele apoiu komunidade k’biit laek sira iha ami nia suku, maibe ha’u nia observa iha oitavu governu konstituisional rekruta ona funsionariu kazuais mai fali iha nonu governu konstituisional hapara ona funsionariu kazuais iha ami nia Postu Fatululik sira na’in 4, hanesan tekniku nai’n-2, finansas na’in ida no ba social na’in ida, sira hapara ona oras ne’e daudaun funsionariu definitivu husi Munisipiu Covalima seidauk destaka funsionariu PNDS iha mai iha Fatululik, tan ida ne’e maka ha’u observa katak bainhira ita harii uma ida laiha tekniku atu monitoring maka badaen sira mos halo buat ida tuir sira nia hakarak no labele tuir ona dezeñu, uma bele kleuk ba mai” nia dehan.

Nia afirma maske governu preve osan barak atu hari uma ba povu maibe kalo laiha ema tekniku atu kontrola, mak osan sira ne’e sei gasta saugati, nune’e nia husi ba PNDS Munisipiu Covalima atu deskata ona funsionariu ba postu fatululik hodi halo kontrollu ba konstrusaun UNP.

“Orsamentu ida ne’ebé lori harii uma ba povu ki’ik sira ne’e orsamentu estadu nian, maibe laiha monitor tuir, enatun ita gasta saugate deit, tan ne’e ha’u sujere ba PNDS Munisipiu no Nasional hakarak ka lakohi tenki destaka ona funsionariu ida mai iha Postu Fatululik liliu ba iha suku Taroman uma sira ne’e harii iha suku ida ne’e bele la’o ba oin ho kualidade di’ak” nia haktuir.

Entertantu iha Suku Taroman Konstrusaun UNP iha uma 5 atinje ona pursentu 50, maibe uma tolu seluk seidauk, badaen sira halo daudaun ona maibe tuir observasaun xefe suku katak konstrusaun ne’ebé badaen sira halo agora ne’e la tuir ona dezenho tanba laiha tekniku atu haree tuir, bainhira badaen sira halo kleuk tiha sira baku rahun fila fali foin hada foun fali no ida ne’e bele fo impaktu ba benefisariu sira.