Covalima(RCCT)12-11-23—Relasiona ho eleisaun orgaun suku ba segundu komando Polisia Nasional Timor Leste (PNTL) iha Munisipiu Covalima, identifika sentru votasaun 123, balu konsidera iha risku.
Nune’e Komandante PNTL Munisípiu Covalima Superintendente Polisia Calisto Gonzaga, dehan iha sentru votasaun balu ne’ebe konsidera iha risku ne’e koloka membru na’in-2 hodi asegura seguransa.
“Ita koloka hela rekursu depende ba sentru votasaun hamutuk 123 iha Covalima, maibe husi sentru votasaun hirak ne’e iha sentru votasaun balu koloka membru na’in 2, balu kolaka membru na’in 1, ba sira ne’ebé koloka na’in 2 tanba risku, fatin sira ne’ebé risku maka hanesan iha parte Postu Administrativu Zumalai, Fatululik inklui Postu Suai mos iha, maibe ne’e sei segrudu” Informa Komandante PNTL Munisípiu Covalima Superintendente Polisia Calisto Gonzaga ba jornalista sira hafoin akompaña STAE Distribui Material Sensitivu no La’os Sensitivu ba sentru votasaun hamotuk 123, Domingu ne’e iha STAE Covalima.
Komandante haktuir komando PNTL Munisípiu Covalima hetan mos apoiu husi unidade sira seluk ne’ebé destakadu iha Munisípiu Covalima inklui kompania operasaun espesial hodi fo seguransa ba eleisaun orgaun suku iha Covalima.
“Ita hetan apoiu husi Unidade Batalaun Ordem Publiku (BOP), Unidade Patrulhamentu Fronteira (UPF), Unidade Polisia Maritima (UPM) Compania operasaun espesial (COE) ho ita sira ne’ebe maka iha ne’e bele garantia seguransa lao ho di’ak” nia dehan.
Entertantu komandante PNTL Munisipiu Covalima Superintendente Polisia Calisto Gonzaga garantia seguransa iha Covalima bele la’o ho di’ak, tanba preparadu antes ona, ne’ebé hahu kedas husi inisiu, eleisaun suku primeiru ronde mai to’o segundu ronde ne’e.
Jornalista : Julio Salinas
Editor : Chamot Nahac
