Covalima (RCCT) 17-08-23 Durante tinan barak nia laran komunidade hamutuk uma kain-317 iha Aldeia Asumaten, Suku Debos, Postu Administrativu Suai, halerik tebes ba bee moos, maibe ohin bele asesu ona ba bee moos, tanba iha oitavu governu liu husi fundu infraestrutura 2022, Programa Nasional Dezenvolvimentu Suku nian dada ona bee moos ba komunidade, no iha governu dasia liu husi Sekretaria Estadu Dozenvolvimentu lokal Mateus dos Santos Talo mai halo ona inagurasaun.
Iha intervensaun hafoin remata halo inagurasaun bee moos Sekretaria Estadu Dozenvolvimentu lokal Mateus dos Santos Talo, husu ba xefe suku no xefe aldea atu tau matan ba bee moos hodi fornese ba komunidade hotu.
Sekretaria Estadu Dezenvolvimentu Lokal Mateus dos Santos Talo, dehan ho bee moos ne’ebe halo ona inagurasaun bele hakman ona komunidade liliu labarik sira ajuda inan no aman lori jergen durante tinan barak nia laran lao ain ho distansia dook ba kuru bee iha Mata Air.
Administrador Postu Administrativu Suai, Luizinho do Rego hatete projetu bee moos ne’ebe konstrui husi PNDS laos deit akontese iha suku Debos deit maibe akontese mos ba suku sira seluk ne’ebe durante ne’e komunidade halerik tebes ba bee moos, liliu iha Suku Suai-Loro no Suku Beko.
Entertantu projetu bee moos mai husi fundu infraestrutura PNDS 2022 nian ne’e ho total orsamentu ba kada programa ho montante hamutuk rihun $ 37.000,00, gastu ba projetu ne’e ho montante orsamentu hamutuk rihun $33.498,75, no balansu orsamentu ho montante hamutuk $ 3.501,25, no projetu bee moos ne’e kaer husi komapania lokal TAVMIRDAY Unipesoal. Lda, konstrusaun ne’e hahu seerbisu iha fulan Outobru no Remata iha Dezembru 2022.
Jornalista JS
Editor CN
