Covalima (RCCT) 02-07-23–Komunidade Suku Tashilin agradese ba komando Polisia Nasional Timor-Leste ho ekipa Bombeiros Munisipiu Covalima ne’ebe ho inisiativa ida ne’ebe diak halo limpeza ba ai horis sira ne’ebe moris iha dalan ninin auto Estrada liliu iha parte Suku Tashilin, postu Administrativu Zumalai sai fatin helik ba ema deskonesidu sira hodi halo asaun kriminozu ba ema halo movimentu uza motorizada no kareta liu husi auto Estrada.

Reprezentante Komunidade Suku Tashilin Iria Alves Pereirra ba jornalista sira hateteho limpeza sira hanesan ne’e bele evita ema kriminozu sira bainhira aproveita tempu hodi mai tuur iha auto Estrada ninin liliu tuur subar an iha ai hun sira ne’e lori fatuk tuda ema bainhira hala’o movimentu uza transporte hanesan kareta ho motor liu auto Estrada.

Komandante PNTL Munisipiu Covalima Superintendente Polisia, Basilio de Jesus, hatete limpeza ida ne’e hanesan kontinuasaun, tanba hare ba situasaun iha fulan hirak liu ba halo ema hotu iha Covalima paniku atu hala’o viazem husi Suai-Dili, no Dili-Suai no ba munispiu sira uza transporte kareta ho motor bainhira atu liu husi auto estrada sente tauk tanba kada semana grupo deskonesidu sira halo asaltu, hapara ema husu osan no buat seluk tan.

Komandante garantia katak ho limpeza ida ne’e la fo ona espasu ba grupu deskonesidu sira atu kontinua provoka tan ema nia movimentu liu husi fatin ida ne’e tanba sira nia subar fatin liliu ba ai hun sira ne’ebe sai hanesan helik fatin ba sira ne’e ne’e hamos hotu ona.

Komandante husu komunidade Tashilin liliu ba inan aman sira atu eduka no kontrola oan sira atu bele hakribi hodi hadia hahalok at sira sai joven ida ne’ebe diak iha futuru.

Entertantu limpeza kontinuasaun iha auto Estrada hahu husi kilo metro 30 to’o 32 ne’ebe ema grupu deskonesidu sira aproveita fatin ida ne’e hodi hein ema halo viazem uza motorizada no kareta liu husi auto estrada, limpeza ida ne’e realiza husi komando PNTL Munisipiu Covalima no hetan apoiu husi Bombeiros Covalima no komunidade suku Tashilin apoiu ai han hanesan hudi, aidila no kafe.