Covalima (RCCT) 30-09-23-Durante tinan barak nia laran, liliu iha era ukun an ida ne’e komunidade iha suku Suku Taroman Postu Administrativu Fatululik, kontinua moris susar atu hetan osan tanba produtu lokal ne’ebé komunidade rasik produs laiha folin no rai deit iha uma to’o dodok no fuhuk basa labele lori asesu ba merkadoria iha Suai tanba impaktu husi kondisaun Estrada ne’ebé la premite.

Xefe Suku Taroman, Leonel Asa ba jornalista sira Sabadu ne’e hateten problema bo’ot ne’ebé durante tinan barak komunidade hasoru iha sira nia moris loro-loron maka susar atu hetan rendimentu, maske sira kada tinan sempre produs produtu lokal barak maibe labele lori asesu ba merkadu basa kondisaun estrada ladi’ak, nune’e Xefe Leonel husu ba Governu atu hadi’a kondisaun estrada diresaun postu administrativu Fatululik.

“Durante ne’e ha’u observa parte agrikultor ne’ebé iha frakeza ida bainhira komunidade sira hasa’e produsaun barak maibe laiha folin tanba ninia impaktu liu ne’e maka estrada, tan ne’e hanesan lider komunitaria husu ba ministeriu relevante liliu ba Ministeriu Obras Publika hakarak ka lakohi tenke hadi’a estrada nune’e hodi hafasil komunidade lori sira nia produtu lokala asesu ba merkadu ho di’ak” informa Xefe Suku Leonel Asa.

Xefe ne’e afirma produtu lokal ne’ebé komunidade Taroman produs maka hanesan batar, koto, fore keli, lis mutin, lis mean, kafe, fehuk talas inklui kamii no nuu, produtu hirak ne’e kada tinan komunidade sempre kolleta ho rezultadu di’ak, basa rai iha fatululik potensialidade agrikultor.

“durante ne’e komunidade produs iha sira nia to’os laran maka hanesan batar, koto, kamii, kafe, fore keli (kedelai)” lis mutin no lis mean inklui nu’u, kualker produtu lokal maka iha ne’e, Suku Taroman rai ida ne’ebé potensialidade ba produsaun hirak kada tinan ne’e komunidade sempre hasa’e ho rezultadu di’ak, maibe sira nunka fa’an ba iha merkadu Suai tanba sira atu lori saku ida ba fa’an iha Merkadu Suai hetan deit $ 10 bele lori selu deit ba motorizada ojek maibe sira labele hetan buat” nia dehan.

Entertantu Xefe Suku Taroman Leonel Asa husu ba nonu govern konstituisional ne’ebé lidera husi Primeiru Ministru Kay Rala Xanana Gusmão atu bele orienta ba iha ministeriu obras publiku atu bele tun ba iha terenu hodi haree kondisaun Estrada Suku Taroman liga Suai.