Xefe Grupu Hali Sarin, Lucio da Costa, konta hafoin forma grupu, mebru sira tau hamotuk osan kada ema ida dolar amerikanu atus rua ($200) hodi sosa fini “Tomati Musan”.
“Ami na’in-5 tu’ur hamutuk fo hanoin ba malu hodi forma grupu ida naran Hali Sarin, loron dahuluk ami sosa ai moruk hodi rega halo du’ut mate, hafoin ami ba kee kanu hasan halo bee husi mota sae mai, ami kee kanu durante loron tolu, depois halo lutu, ba sosa fali bibit ka tomate musan falun (bungkus) 10 kada tomate falun ida hetan iha laran hetan musan 1.750 ne’ebé falun 10 kona tomate musan 17.500, maibe husi tomate musan hirak ne’e ami kuda balu mate maka hetan de’it moris hun rihun sanulu resin maka ohin ita hetan ona nia rezultadu,” dehan Xefe Grupu Hali Sarin Lucio da Costa, ba RCCT iha area Hali Sarin, Belulik Kraik, Suku Belulik Leten, Domingu (26/05).
Lucio da Costa rekuñese ninia grupu sei menus ekipamentu atu fasilita sira hakiak tomati, tan nia husu ba governu liu liu ba ministeriu revante sira atu tau matan no fasilita sira.
“Ami husu ba governu aban bainrua ami sei atu halo liu tan ida ne’e hakarak husu mulsa no tanke rega nian tanba ho rezulta ne’ebé ohin ita hetan durante ami uza tanke hodi rega ne’e ida de’it ne’ebé ami forsa lato’o, se bele mos husu atu bele ahuda makina dada bee tanba tama ona ba fulan setembru mota komesa maran hodi la sulin tama ona ba kanu ne’ebé ami kee hodi rega ba tomate ami hakiak” nia dehan.
Fatin hanesan Missionario Fransiskan São Miguel Arcanzo iha Fatumea, Bruder Simào Nono, reforsa hodi husu ba governu atu apoiu fasilidade ba komunidade sira mak iha inisiativa rasik forma grupu hodi loke servisu ba sira nia an iha fatumea.
“Ha’u rasik hamutuk ho sarani sira mai vizita sira nia grupu ho naran Hali Sarin, iha grupu laran ne’e hamutuk ema na’in-5 inisiativa kuda tomati maske ho esperiensia ne’ebé sira iha ohin ita hotu hare nia rezultadu di’ak, tan ne’e husi igreja nafatin hamutuk ho sarani sira husu ba parte kompotente liliu ba Ministeriu Agrikultura atu bele tau matan netik ba ita nia komunidade sira ne’ebé iha interese atu sai na’in nudar agrikultur, hadomi nafatin ita nia rain ne’e, ” informa Misionariu Bruder Simão Nono, Ordo Fratrum Minorum (OFM).
Entertantu tomati hun rihun sanulu resin ne’ebé grupu Hali Sarin kuda iha to’os hektar ida iha area hali sarin, Aldeia belulik kraik, suku belulik leten, postu administrativu fatumea ne’e, prontu ona atu kolleta maibe sira sei konfuzaun no infrenta difikuldade ba merkaduria.
Nune’e husu entidade no negosiate sira ne’ebe hakrak atu sosa no fa’an tutan tomati bele kontaktu hodi halo negosiasaun.
Jornalista : Julio Salinas
Editor : Chamot Nahac
