Tan ne’e, Liu husi konferensia imprensa Segunda ne’e iha Suku Matai, Benefisariu Bolsa da Mãe Jerasaun Foun sira liu husi Porta Voz, Elviana Guterres, hato’o sira nia lamentasaun konaba desizaun Nonu Governu nain ne’e tanba sira konsidera Prgorama Bolsa da mãe Jerasaun foun fo vantazen no no enkoraza sira.
“Ami benefisariu ba programa bolsa da mãe jerasaun foun iha Covalima la simu ho desizaun Ministra Solidarieda Sosial no Inkluzaun Verónica das Dores ne’ebé maka deside atu hapara programa bolsa da mãe jerasaun foun iha tinan oin, ami lamenta tebes ho desizaun ida ne’e tanba programa bolsa da mãe jerasaun foun enkoraza tebes ami hodi hakbesik an ba fasilidade saude hodi halo kontrola regular ba ami nia oan nia saude, hafoin ida ne’e ajuda tebes ami no ami nia oan sira hodi asesu ba ai han nutritivu diak nune’e oan sira atu bele moris diak no saudavel” informa Benefisariu Bolsa da Mãe Jerasaun Foun Suku Matai, Elviana Guterres ba jrnalista sira liu husi konferensia imprensa ne’ebé hala’o iha Suku Matai, Postu Administratvu Maucatar, Segunda ne’e.
Liu Husi Porta Vozs Elviana, Benefisiariu sira husu ba Prezidente da Republika, José Ramos Horta no Primeiru Ministru, Kay Rala Xanana Gusmão atu tau atensaun ba asuntu ida ne’e, tanba sa maka hakarak atu hapara programa bolsa da mãe jerasaun foun, tanba liu husi programa ida ne’e bele garante futuru diak ba oan sira nia saude.
“Ami ejiji ba governante sira liliu ba Prezidente Republika José Ramos Horta ho Primeiru Ministru Kay Rala Xanana Gusmão nudar lider masimu ba nasaun ida ne’e atu kontinua suporta nafatin ba ami no ami nia oan sira liu husi programa bolsa da mãe jerasaun foun, tanba programa ida ne’e importante tebes hodi garante futuru ne’ebé diak liu ba ami nia oan sira nudar futuru ba nasaun ida ne’e” nia dehan.
Iha fatin hanesan, benefisariu bolsa da Mãe Jerasaun Foun Suku Matai, Juleta de Jesus sente triste bainira rona governu liu Ministeriu Solidariedade Sosial no Inkluzaun atu hapara programa bolsa da mãe jerasaun foun, tanba tuir moto Timor-Leste nian hatete investe ba labarik, investe ba Timor, tan ne’e husu ba governu atu labele hapara no kontinua programa ida ne’e.
“Tuir ami nia hanoin sente triste se bainhira hapara bolsa da mãe jerasaun foun, ami sente kontente durante ami simu bolsa da mãe jerasaun foun, tanba saida maka agora atu hapara fali programa bolsa da mãe jerasaun foun, ho ida ne’e ami povu ladun satisfas ho razaun ida ne’e, tanba tuir moto Timor-Leste nian dehan katak investe ba labarik, investe ba Timor ho ida ne’e ami ladun satisfas ami hakarak kontinua povu kiik bele hetan bolsa da mãe jerasaun foun nian” informa Juleta de Jesus.
Nune’e mos, Ines Sarmento mos hatete presija tebes osan atu hodi sustenta nia oan ne’ebé moris ho kondisaun difisiensia, tanba liu husi programa bolsa da mãe jerasaun foun nia bele lori osan refere sosa susu ben, na’an no ai fuan sira bele fo ba nia oan han.
“Ha’u nia oan moris ho difisiensia hau presija osan hodi sustenta nia moris, osan hodi bele sosa susu ben, modo tahan, na’an, ai fuan hodi ajuda fo han hau nia oan bele hetan saude diak tanba ho hahan hirak ne’e bele hetan vitamina ba nia saude” Ines Sarmento dehan.
Entertantu liu husi konferensia imprensa ne’e benefisariu bolsa da mãe jerasaun foun sira iha Suku Matai, husu ba governu atu labele hapara programa ida ne’e tanba liu husi programa ida ne’e inan sira bele lori oan hakbesik ba iha fasilidade saude ho di’ak liu tan hodi halo tratamentu saude.
Jornalista : Julio Salinas/Moi Chung
Editor : Chamot Nahac
