Covalima (RCCT)) 08-06-24-Relasiona ho akontesementu udan bo’ot iha tetoriu Covalima halo be mota tun maka’s rezulta komunidade sira iha Aldeia Kulu-Oan, Suku Tashilin, Postu Administrativu Zumalai kalan toba ladukur tanba tauk korente mota Lomea no Mota Hunete maka’as hodi tama komunidade nia uma,
Komunidade Kulu-Oan Maria de Fatima sente triste tanba korente mota Lo’omea no Hunete tun maka’as hodi tama komunidade nia uma inklui estraga plantasaun iha to’os no natar hahu iha rohan fulan maiu to’o inusiu fulan juñu ne’e.
“Ha’u hanesan komunidade Aldeia Kulu-Oan, Suku Tashilin, sente preokupa no triste tanba be husi mota Lo’omea no Hunete tama ami nia aldeia hodi estraga ami nia kintal hanesan modo tahan, batar, aifarina, ai manas inklui natar no seluk tan,” Komunidade Kulu-Oan Maria de Fatima, dehan, sabadu (08/06)
“ami mos agora daudaun labele tein iha dapur laran tanba be sa’e maka’as hodi afeta ami nia atividade no ami nia oan sira labele asesu ba eskola iha EBC Tashilin tanba korente be maka’as, dalan husi Kulu-Oan ba Tashilin agora grave sai ona hanesan mota dalan tan ne’e husu ba autoridade kompetente liliu iha postu no munisipiu atu tun direita hare kondisaun ne’ebé oras ne’e komunidade iha Kulu-Oan infrenta” Tenik Komunidade Kulu-Oan Maria de Fatima ba jornalista iha nia hela fatin Kulu-Oan.
Komunidade Reinaldo Carvalho dehan oran ne’e daudaun komunidade iha Kulu-Oan sente hela la seguru tanba mota rua maka fo ameasa maka’as liu.
“Agora Aldeia kulu-Oan, Suku Tashilin durante akontese udan bo’ot hanesan ema hotu hatene Kulu-Oan aperta maka’as husi mota rua hasoru malu ami sai la di’ak, tan ne’e husu ba ukun na’in sira atu tau matan uitoan, labarik sira husi Kulu-Oan atu ba eskola iha Tashilin liu ladi’ak fila hotu, no agora daudaun animal sira komunidade haki’ak hanesan manu no fahi bee lori hotu ne’e maka ami nia hato’o atu ukun na’in sira tau matan” nia dehan.
Nune’e mos Xefe Aldeia Kulu-Oan, Afonso S. Martins, salienta, iha tempu udan komunidade Kulu-Oan kalan toba la dukur tan tauk mota ne’ebé dadaun ne’e fo ameasa maka’as tebes sira.
“Ami kalan mos toba la dukur no kontente laiha tanba mota mai ameasa maka’as, komunidade sira balu agora toba de’it iha tahu laran tanba fatin maran ba sira laiha ona bee tama hotu” nia dehan.
Entertantu tuir observasaun iha terenu nota katak durante akontese udan bo’ot iha Munisipiu Covalima hodi rezulta fasilidade publiku barak hetan estragus, be tama komunidade nia uma, plantasaun iha to’os no natar hetan estragus total no difikulta estudante sira iha Aldeia Kulu-Oan labele tuir prosesu aprendisajem iha Eskola Baziku Central Tashilin tanba korente beemaka’as halo estudante liu ladi’ak.
Jornalista : Julio Salinas
Editor : Chamot Nahac
