Teknika implementador Diresaun Nasional Pekuaria, Felisiano Fernandes, hateten sira iha programa ne’e realiza tanba sempre akontese menus residus ka hahan ba animal iha tempu bairo ne’ebé halo animal sira sei hakfuik an.

“Programa ne’ebé ami implementa mak hanesan atu konserva ita nia residus ka hahan restu ne’ebé mak durante ne’e ita nia komunidade sira kuda rasik maibe tempu ba hahan animal menus ne’e sira la utiliza entaun programa da ne’e ami halo tia modelu ida pilotu ida ba Munisipiu tolu, ne’e ami halo pilotu ida atu hanesan lalenok ba ita nia hakiak na’in sira hotu hodi tuir buat ne’ebé mak ami implementa iha Munisipiu tolu tanba hahan iha tempu bailoro liliu ba animal ruminante ne’e araska tebes entaun ami halo konserva iha fatin ida bainhira tempu bailoro hahan menus, karik ida ne’e hanesan responde hahan adisional ba ita nia animal sira ne’ebé mak ita husik libre iha ne’e no ita atu dada fila fali ita nia animal sira ne’ebé mak durante ne la hamutuk ona ho nia maluk sira” Felisiano Fernandes, esplika iha Busakukun (05/06)

Xefe grupu Haburas, Martinho Barros, informa membru grupu ne’e partisipa iha programa konservasaun ai han ba animal iha aldeia Busakukun hamotuk ema na’in 20.

“Sira esplika mai dehan buat ne’e atu hodi hamaus fila fali animal karau sira ne’e, tanba ida ne’e ha’u mos tuir, hau nia oan sira, alin sira konkorda hotu be ha’u mak sai xefe grupu haburas Busakukun, Suku Debos Suai Covalima ami hamutuk 20 pesoas mane hotu” nia dehan.

Iha fatin hanesan Xefe Aldeia Busakukun, Januario Amaral do Carmo, aseita ho programa residus ne’ebé implenta husi Ekipa teknika pekuaria nasional iha aldeia Busakukun tanba durante ne’e sempre hasoru difikuldade laiha hahan ba animal iha bailoro naruk.

“Programa pekuaria ne’e mai iha fulan kotuk sira halo identifikasaun programa, ne’e primeira vez depois sira husu konaba nia esplikasaun konaba nia lala’ok ida atu hari uma ne’e ha’u senti ida ne’e apar ho ami nia komunidade sira nia servisu tanba iha uma konservatoriu rai hahan ba animal ba bailoro naruk ne’e kapas, tanba iha ha’u nia Aldeia ne’e difikuldade bainhira bailoro naruk animal sira laiha hahan, entaun ami komunidade sira halo natar halo to’os entaun depois de koilleta hare kain batar kain la uza, soe deit, entaun ho programa ida mai husi pekuaria ninian katak ita sei uza batar kain sira ne’e sei uza fila fali, rai iha fatin ida fo fali ba ita nia animal sira ne’ebé mak iha hanesan karau no bibi” Xefe Aldeia Busakukun, Januario Amaral do Carmo.

Entretantu Xefe Aldeia Busakukun afirma konaba dadaus 2024, komunidade nia animal hakiak iha Busakukun kompostu husi bibi iha 86 resin no karau iha 154, Fahi 17 no manu 246.

Jornalista: Moichung/Matias de Sousa

Editor      : Chamot Nahac