Covalima (RCCT) 08-02-24-Tuir relatoriu husi Eletrisidade de Timor Leste EDTL. Ep iha Covalima, iha Suku Beco, Postu Administativu Suai, Komunidade sira iha Aldeia 6 mak hanesan Aldeia Tobur, Teda, Gala, Bibel, Dilo Hilin no aldeia Halik maka seidauk asesu total ba liña eletrisidade.
NotisiaRelevante: https://radiosuai.blogspot.com/2024/02/aldeia-29-iha-covalima-seidauk-asesu-ba.html
Nune’e, Administrador Postu Administrativu (APA) Suai Idelfonso Maria Amaral, kompromete, durante nia mandatu sei esforsu, rabat ba governu liu husi ministeriu relevante sira hodi hetan solusaun atu komunidae Aldeia 6 iha Suku Beko Bele Asesu ba lina eletrisidade.
“Hare ba asuntu ida ne’e, ha’u sei esforsu an no ha’u sei direitamente halo pedidu ida ba ministeriu kompetente oinsa atu bele atende ita nia komunidade hodi asesu ba ahi eletrisidade ne’ebé tuir planu governu nian, konaba bee oinsa ha’u sei bolu hamutuk ho ha’u nia liña ministerial ne’ebé destaka iha nivel postu oinsa atu bele tau hamutuk ideas ka planu ida ne’ebé di’ak hodi nune’e bele esforsu ba iha munisipiu atu nune’e ha’u nia komunidade sira bele asesu ba bee moos” Idelfonso Maria Amaral, dehan ba jornalista sira iha salaun Diamond, Audia, Kamanasa Tersa (06/02) hafoin simu Pose nudas Administrador Postu Administrativu Suai husi Nonu Governu liu husi Vice MAE, Jacisnto Rogoberto Gomes de Deus.
Administrador Postu Administrativu Suai mos manifesta, sei kordena ho funsionariu Programa Nasional Dezenvolvimentu Suku (PNDS) sira ne’ebé destaka iha postu oinsa hodi hatene tuir konaba projetu PNDS nian, hira maka finaliza ona no hira maka seidauk finaliza ninia konstrusaun.
“Hanesan Administrador Postu, foun ba oin ne’e ha’u sei hare relatoriu husi funsionariu sira ne’ebé destaka iha nivel postu konaba Programa Nasional Dezenvolvimentu Suku (PNDS) nian, iha ne’eba ha’u sei hare tuir sira nia relatoriu konaba projetu abandonadu hanesan PNDS nian ba iha tinan 2020 ate agora balu seidauk finaliza pursentu 100. ida ne’e ha’u sei esforsu ho ha’u nia xefe suku sira para atu hare relatoriu iha implementasaun projetu PNDS iha suku sira” tenik APA Suai.
Entertantu Administrador Postu Administrativu Suai Idelfonso Maria Amaral kompromete durante iha nia mandatu sei tau atensaun ba hodi rezolve problema ne’ebe komunidade sira infrenta, liu konaba Be mos, estrada no mos eletrisidade.
Jornalista : Julio Salinas
Editor : Chamot Nahac
