Nune’e, Prezidente Autoridade Munisipiu Covalima Miguel Armada Cardoso “Razão” agradese ba komunidade na’in ba rai sira ne’ebéé fo ona rai luan metru-8 ba governu hodi hadi’a dezenvolvimentu iha Covalima.

“Horseik ita hetan tulun ida husi kompañia Unidade señor Amuku, ha’u rasik hakat ba iha nia uma husu ajuda katak dalan sai ita lere ona bele ita bo’ot sira ajuda ami ka lae hodi nune’e bele dudu netik dalan ne’e, tanba ida ne’e maka realiza, tanba ida ne’e maka iha hakarak hato’o obrigado barak ba komunidade hotu, agradese ba aman maromak, agradese mos ba komunidade hirak ne’ebéé oferese ona rai hodi nune’e rai ne’e bele nabilan ba ita merkadu ne’e ita bele uza ba oin” dehan PAM ba jornalista sira hafoin ho ekipam tun direita ba iha terenu hodi akompana makina komesa dudu ona dala foun liga ba merkadu, Kinta (01/08).

Reprezenta Diretór Terras no Propriedades Munisipiu Covalima Pedro Tilman, hatete antes ne’e halo ona levantamentu dadus ho na’in ba rai iha hotu, atu evita mosu konfuzaun, nune’e terras foti deit rai entre baliza para rain iha sori-sorin bele kona hotu la’os fera iha klara.

“Evita atu sira labele halo protesta ami foti baliza husi sorin-sorin, ami fera husi baliza ba de’it nune’e sorin kona, sorin mos kona nune’e labele estraga sira nia rai, nune’e sira nia rai ne’e tenke uza hotu tanba liu husi baliza de’it ho ida ne’e maka sira hotu konkorda” nia dehan.

Reprezenta na’in ba Rai Lucas Cardoso Amaral, rekoñese katak loos iha momentu enkontru PAM husu rai metrru-4 maibe na’in ba rai hotu-hotu konkorda fo rai metru 8 ba governu hodi loke dalan ida ne’e, no parte autoridade promete selu deit ai horis no mos na’in ba rai hotu konkorda governu la selu ka indiminza rai.

“Foin lalais forma governu foin sira bolu ami na’in ba rai hamutuk ema na’in-8 ba enkotr iha postu Suai ami mos konkorda iha momentu ne’ebé sira husu rai atu ami fo metru 4-6 maibe ami maka dehan la’e ami oferese tan metru-2 para halo metru-8, tanba hare ba merkadu ida ne’e rejional ne’ebé halo estrada luan metru-8, razaun ida mos katak kuandu estadu ka governu halo buat ida dala ida de’it, la’os kada tinan maka halo bebeik tanba ida ne’e maka ami aumenta halo metru-8 ne’e rai, liu husi enkontru ne’e sira promete mai ami atu selu ai horis, depois ami rasik mos husu fatin ki’os iha merkadu laran ne’ebé 20 ne’e tenke fo 8 ba ami na’in 8 ne’ebé maka oferese ona rai gratuita ba governu hodi halo dalan ne’e, selu rai laiha so selu ai horis de’it, iha momentu ne’ebé PAM konkorda, sira husi MCI mos konkorda, obras no terras mos sira konkorda hotu” dehan Lucas.

Entertantu dalan ne’ebé loke foun husi Rua Evenida Antonio Mendonça borut ba iha merkadu Tua Derek, Kamanasa ne’e nia medida naruk metru 600, no luan metru-8, no hahu Kinta (01/08) ohin estrada foin refere komesa dudu ona hafoin iha fulan ida liu ba funsionariu publiku sira iha Covalima halo uluk limpeza jeral iha fatin refere.

Jornalista : Julio Salinas

Editor       : Chamot Nahac