COVALIMA—-Komamdo Polisía Nasionál Timor-Leste (PNTL) Munisípiu Covalima, Tersa (10/01) feira ne’e promove membru na’in -10 hetan promosaun diviza husi ajente ba ajente prinsipal.
Komandante PNTL Basilio afirma promosaun diviza ida ne’e, haree durante ne’e sira prestasaun servisu iha instituisaun PNTL, espesiál iha Munisípiu Covalima no ba instituisaun estadu.
“Ohin ita nia membru PNTL nain-10, hetan promosaun diviza husi ajente ba ajente prinsipal, sira-ne’e hetan promosaun hanesan antiguidade durante periódu tinan 5 sira sai ajente hodi promove ba ajente prinsipal” informa Komandante PNTL Munusipiu Covalima, Superintendente, Basílio de Jesus, ba jornalista sira, hafoin remata tula devza ba membru na’in-10 iha komando PNTL Covalima, Tersa (10/01).
Tanba ne’e komando jerál PNTL rekoñese durante ne’e fó sira nia konstribuisaun no dedikasaun hodi servi povu ida ne’e hala’o misaun ho papel hanesan ajente seguransa sira nia direitu atu hetan promosaun durante periódu tinan 5.
Basilio dehan atu hetan promosaun diviza ne’e haree ba sira nia disiplina no prestasaun di’ak la iha impedementu presta servisu bainhira to’o tempu tenke promove diviza, maibé depende mós sira nia prestasaun servisu.
Maibé promosaun diviza hetan pendente bainhira sira enfrenta kazu ruma ne’ebé sei iha departamentu justisa se la iha to’o tempu sira bele hetan promosaun ba sira nia diviza.
Membru PNTL na’in-10 fó promosaun diviza ne’e mai husi, forsa rezerva na’in-3 , unidade tranzitu rua (2), investigasaun na’in-ida (1), polísia komunitária na’in-ida (1), polísia eskuadra- rua (2) no lojistik na’in-ida (1).(Azu)
