Covalima (RCCT) 17-10-23–Komando Polisia Nasional Timor-Leste iha Munisipiu Covalima iha ona planu atu destaka membru polisia ema na’in-2 kada sentru votasaun hodi garantia seguransa iha eleisaun ba orgaun suku ne’ebé sei akontese iha loron 28 fulan Outobru tinan ne’e.
Total sentru votasaun iha Covalima hamutuk 148, tan ne’e komando PNTL prepara ona membru polisia 148, maibe tuir planu sei destaka membru na’in-2 iha sentru ida, nune’e komando PNTL Munisipiu husu tan apoiu membru polisia na’in-30 iha komandu jeral (nasional), esplika Komandante PNTL Munisípiu Covalima, Superientendente Polisia Calisto Gonzaga, iha resinto PNTL Covalima segunda (16/10)
“Ita prepara iha 148 pesoas ne’e kada sentru votasaun ida ema na’in ida, maibe ita planu sei tau ema na’in-2 iha sentru votasaun ida ne’ebe ita preparadu, tanba ita nia proposta ba iha nasional husu ema na’in-30 atu hodi apoiu fo seguransa ba iha eleisaun suku ne’e bele la’o ho hakmatek” informa Komandante PNTL Munisípiu Covalima, Superientendente polisia Calisto Gonzaga, ba jornalista sira iha nia kna’ar Komando PNTL Munisípiu Covalima Segunda (16/10/23).
Nia fundament, laiha preokupasaun ekipamentu seguransa tanba eleisaun ba orgaun suku, ne’e atu hili lideransa komunitaria ne’ebe ho ninia partisipasaun votante difrente ho eleisaun parlametar no eleisaun prezidensial.
“Ha’u hanoin ba ekipamentu sefuransa ne’e ita iha tanba ne’e eleisaun ida ne’ebé maka ita hili ita nia lideransa komunitaria konserteza nia seguransa ne’e hanesa fali iha eleisaun atraves foin lalais liu ba hanesan eleisaun parlamentar, eleisaun prezidensial, maibe ninia partisipasaun difrente tanba ema ida ne’ebé moris iha suku ida ne’e nia tenke vota duni suku ida ne’e” nia haktuir.
Komandante PNTL Covalima ne’e husu ba komunidade hotu iha Covalima se eskolla no fo fiar kandidatu hodi eleitu sai xefe suku, nune’e labele lakon oportunidade atu partisipa iha loron votasaun.
Komandante Calisto mos husu komunidade hotu atu kria paz no establidade hodi simu rezultadu eleisaun xefe suku, tanba komunidade rasik maka no fihir deside ninia ema rasik hodi fo votus sai xefe suku ba mandantu tinan 7 nia laran.
Jornalista : Julio Salinas/ Baltazar Monis
Editor : Chamot Nahac
