Covalima (RCCT) 22-02-24-Komandante PNTL Munisipiu Covalima, Superintendente Polisia, Calisto Gonzaga iha loron Tersa (20/02) feira loro kraik tuku 15 : 00otl akompaña husi ekipa komando munisipiu hala’o vizita kortezia ba Fronteira Postu Integradu Fronteira Salele atu kria lasu amizade no fraternizasaun entre Ajensia no liña ministeriais sira ne’ebé destaka iha Fronteira.

Komandante PNTL Munisipiu Covalima, Superintendente Polisia Calisto Gonzaga, ba jornalista sira hateten iha vizita kortezia ida ne’e ho intensaun atu hasoru ho intitusaun relevante sira ne’ebé durante ne’e hala’o sira nia k’nar iha Pontu entrada.

“Ha’u nia intensaun atu hasoru ho ajensia sira ne’ebé maka iha postu integradu ka liña fronteira ida ne’e atu troka ideias ligasaun ho sirkutaria, defesas, kontrolu, asegura, transporte tama sai, sidadaun sira tama sai, importasaun, exportasaun no atividade ilegal sira, ita konta hotu, purtantu hotu-hotu tau pontu de vista para atu nune’e iha futuru servisu hotu ita tenke komunika ba malu, ita tenke reforsa servisu balu ne’ebé ezersisiu, nune’e ita bele garante iha fronteira ida ne’e, no ita mos hatudu ba estadu Indonezia katak ita mos estadu ida tenke iha lei, iha regulamentares para ita bele uza liuliu simu ita nia bainaka sira husi Indonezia mai, bele mos tau matan ba ita nia ema sira ne’ebé maka ultrapasa ba iha ne’eba, purtantu ita nia objetivu atu troka ideias depois informasaun sira ne’e ita halo estudu ida ne’ebé ita foti desizaun ida ne’ebé atu hare mos ba dezenvolvimentu ba konstrusaun estadu, partikular iha munisipiu ida ne’e no mos ba iha estadu RDTL nian” katak Komandante PNTL Munisipiu Covalima, Superintendente Polisia Calisto Gonzaga, iha Fronteira Salele, Tersa (20/02.

Sorumutu ne’e iha ligasaun ho preparasaun ba garantia siguransa iha liña fronteira relasiona ho vizita Amo Papa mai Timor Leste iha fulan Augustu tinan ida ne’e.

“Ha’u fiar katak ita tenke hein protokolu, ita nia Amo papa ne’e tama iha kategoria VIP, lider ida ke as liu husi igreja katolika, ne’ebé ha’u fiar katak ne’e governu sentral nia toma medida atensaun ona, maibe ohin ami temi uitoan ne’e so de’it atu prepara hanoin balu kuandu governu sentral hatun ona ninia diretiva oinsa maka atu bele garante ninia prezensa iha ne’e mai, ohin mos ami ko’alia sobre ita nia sarani sira ne’ebé iha parte Indonezia ho mos komunidade balu hakarak atu simu parese estadu ho estadu ko’alia ba malu altraves dalan rua liu husi fronteira postu ida ne’e bele mos liu husi kalohan ho aviaun ne’e aeroportu ita nian mos iha, Dili, Baukau no Oekusi mos iha, purtantu ida hein governu sentral, hein estadu bainhira maka atu bele identifika protokolu ne’e hau hanoin diskute hela buka meus para ita asegura, ita garante prezensa ida ne’ebé maka altu liu husi estadu Roma, husi lider igreja nian bele mai iha ita nia rain, ohin ita temu uitoan ne’ebé prontu” Komandante PNTL Munisipiu Covalima, Superintendente Polisia Calisto Gonzaga, informa.

Komandante PNTL Munisipiu Covalima, Superintendente Polisia Calisto Gonzaga, hala’o vizita kortezia ba iha Postu Integradu Fronteira Salele, akompaña husi Xefe Seksaun Operasaun, Xefe Seksaun Administrasaun, Xefe Seksaun Investigasaun Kriminal, Xefe Seksaun Rezerva Intervensaun Rapida, Xefe Seksaun Tranzitu Rodaviaria, Xefe Seksaun Justisa no Disiplina, Xefe Sevisu Intelejen Polisia.

Entertantu enkontru kortezia ho intensaun atu Kesi metin lasu amizade no fraternizasaun ho servisu konjunta iha liña frontera ne’e partisipa husi Autoridade Fronteira Postu Integradu Salele, mak hanesan Xefe PIF, Diretór Aduaneiru, Komandante F-FDTL Postu Tilomar, Komandante UPF, Xefe Imigrasaun, Xefe DNTT, Xefe Karantina, Xefe Tranzitu iha Fronteira Salele no mos Xefe SNI.

Jornalista : Julio Salinas

Editor       : Chamot Nahac