Martinho Amaral “Koba” hatete durante ne’e nia parte observa veteranu iha Covalima barak liu mak seidauk hakerek istoria, kuandu veteranu la brani hakerek istoria rasik mak signifika nia la’os ema veteranu.

“Durante ne’e ha’u hare veteranu barak liu maka seidauk hakerek nia istoria tanba saida, se la brani hakerek istoria entaun ne’e la’os veternu, veteranu tenke hatene istoria, pelumenus konta netik surat tahan ida ka rua hanesan ne’e se lae ita nia oan ho bein oan sira la fiar, joven sira ka jerasaun foun sira la fiar katak ita ne’e veteranu, veteranu ida osan nian, veteranu ida projetu nian, maibe ita hakarak veteranu ida ne’ebé iha istoria rasik” Kolaborador Rejiaun 4 Munisipiu Covalima, Martinho Amaral “Koba” hasara lia hirak ne’e ba RCCT hafoin partisipa halot isin mate Saudoso Maximiliano Amaral do Rego “Foc Mesac” iha semiteriu publiku Fohorem Segunda (18/12/23).

Koba haktuir veteranu balu laiha duni istoria tanba sira manipula dadus oinsa atu bele hetan osan lalais, tan ne’e husu ba governu tau atensaun ba asuntu hanesan atu nune’e hodi labele haburas beibeik korupsaun iha Timor-Leste.

“Ha’u hanoin barak liu lakohi hakerek istoria tanba sira laiha istoria duni, maibe manipula dadus, hanesan ohin hau hatete sira ne’e hare liu ba osan, tan ne’e hau apela ba governu para oinsa tau matan fila fali ba ema sira hanesan ne’e para oinsa neutraliza tiha labele halo korupsaun ba nasaun ida ne’e mak hau hakarak apela ba ema hotu se lakohi hakerek istoria tanba nia laiha istoria duni” nia dehan.

Entertantu Kolaborador Rejiaun 4 Munisipiu Covalima, Martinho Amaral “Koba” enkoraza veteranu hotu liliu iha Covalima atu bele hakerek ona istoria, hodi rai iha muzeun, kuandu la hakerek istoria hodi rai iha muzeum maka jerasaun sira tuir mai ne’e sei la hatene istoria.

Jornalista : Julio Salinas/Balta Monis

Editor       : Chamot Nahac