Covalima (RCCT) 28-08-24-Kolaborador Komando Politika Militar Rejiaun IV, Martinho Amaral “KOBA” hatete foinsa’e tenki aprende maka’as liu tan hodi hatutan fali istoria moruk iha luta ba libertasaun timor nian ba jerasaun tuir mai.
Vetaranu Koba Hatete Estudante hanesan jerasaun foun no futuru Timor tenki aprende no akompaña istoria timor nian ne’ebé hatur liu husi prosesu naruk ne’ebé hafalun ho terus wain.
“Istoria Timor-Leste ne’e ita nia foin sae sira maka tenke aprende maka’as no akompaña para nune’e aban bainrua sira bele hatutan fali ba jerasaun seluk ne’e importante liu tanba ukun-an liu husi istoria, ukun an la’os monu husi lalehan, maibe liu husi prosesu terus, ruin ho ran hanesan ia ida karik nia hun ne’e moruk, maibe nia fuan midar ne’e maka ukun rasik an ne’e” dehan Veteranu Martinho Amaral “KOBA” ba jornalista sira hafoin partisipa hodi sai orador ba dialogu komunitaria no reflesaun ho tema hakerek livru istoria rezistensia organizassaun juvenil no estudantil ba libertasaun nasional,ne’ebé hala’o iha rezidensia Administrasaun Postu Administrativu Suai hodi selebral loron konsultasaun popular 30 de Agustu 1999-2024 ba dala-25.
Veteranu Martinho Amaral “KOBA” husu ba foinsa’e atu banati tuir funu na’in sira ne’ebé iha tempu okupasaun nia laran luta ba ukun rasik-an ida ne’e, no ekonkoraza jerasaun foun tenke estuda maka’as tanba nasaun ida hamrik presija ema matenek atu halo dezenvolvimentu.
“Ha’u nia mensajem ba foinsa’e sira maka atu kaer tuir ezemplu ne’ebé uluk funa na’in sira sakrifika-an nudar rezistensia Timor-Leste, nudar jerasaun foun tenke hatene hodi prepara an oinsa buka matenek, tenke iha esperiensia maka’as para nune’e aban bainrua sira maka bele kaer futuru Timor-Leste nian” Veteranu Martinho Amaral “KOBA” husu ba foinsa’e sira.
Enkuantu Veteranu Martinho Amaral “KOBA” hato’o lia ne’e hafoin partisipa no sai orador iha dialogu komunitaria no reflesaun ho tema hakerek livru istoria rezistensia organizassaun juvenil no estudantil ba libertasaun nasional, ne’ebé hala’o iha Salaun Administrasaun Postu Administrativu Suai hodi selebral loron konsultasaun popular 30 de Agustu 1999-2024 ba dala-25.
Jornalista : Julio Salinas
Editor : Chamot Nahac
