Diretór Ezekutivu Klibur Dezenvolvimentu Sustentavel Timor Oan (KDSTO) Munisipiu Covalima Alfredo do Santos, hatete bazeia ba dadus ne’ebé KDSTO rekolla iha Covalima rejista ona ema ho difisiensia hamutuk ema na’in 790 resin iha Covalima maibe ho tipu difisiensia la hanesan.
“Atu dehan dadus ne’ebe KDSTO rekolla hahu husi fulan Novembru to’o Dezembru 2023 nian, mai Janeiru 2024 nian atu dehan dadus hamutuk total ema ho difisiensia 790 resin maka ita rejistu ne’e kompostu husi difisiensia fiziku, mental, matan no komunikasaun ne’e maka ita rekolla iha Covalima” informa Diretór Ezekutivu Klibur Dezenvolvimentu Sustentavel Timor Oan (KDSTO) Munisipiu Covalima Alfredo do Santos, ba jornalista sira hafoin apoiu nesesidade baziku ba difisiente sira iha Postu Administrativu Tilomar Segunda (15/01/24).
Nia haktuir, husi numeru ne’e, ema ho difisiensia balu hetan ona apoiu no balu seidauk, hanesan iha Postu Administrativu Tilomar foin ema na’in 7 maka hetan ona apoiu nesesidade baziku.
“Iha Postu Tilomar ita rekonese foin maka sira na’in-7 ne’e maka hetan apoiu nesesidade baziku hanesan ohin hau dehan ona apoiu imediatamente mais KDSTO nafatin halo esforsu oinsa maka atu bele apoia hotu ba maluk difisiente sira iha Tilomar, atu dehan tinan 2023 ita apoia iha Postu Administrativu Maukatar, Suku Ogues nian” Diretór Ezekutivu Klibur Dezenvolvimentu Sustentavel Timor Oan (KDSTO) Munisipiu Covalima Alfredo do Santos Informa.
Entertantu KDSTO nafatin iha esperansa atu ko’alia ho entidades sira hotu para nune’e maluk difisiente sira bele sente hetan hotu apoiu nesesidade baziku hanesan maluk sira balu agora hetan ona ne’e.
Jornalista : Julio Salinas
Editor : Chamot Nahac
