Covalima (RCCT) 15-01-24-Assosiasaun Klibur Dezenvolvimentu Sustentavel Timor Oan (KDSTO) Munisipiu Covalima Segunda feira apoiu nesesidade baziku ba ema ho difisiensia na’in 7 iha Suku Beiseuk no Lalawa Postu Administrativu Tilomar, Munisípiu Covalima.
Diretor Ezekutivu Klibur Dezenvolvimentu Sustentavel Timor Oan (KDSTO) Munisipiu Covalima Alfredo do Santos ba jornalista sira hatete benefisiariu na’in 7 ne’e infrenta kondisaun moris ne’ebé ladun di’ak, tan ne’e nesessariu tebes atu hetan apoiu husi KDSTO no instituisaun relevante sira.
“Ha’u atu dehan bazeia ba iha semana kotuk ha’u mai vizita hodi hatene situasaun maluk difisiente sira nian iha suku rua ne’ebé mak iha ho postu ne’ebé hanesan iha Suku Ha’uk ho Lalawa, iha Aldeia Ai-Oan no Aldeia Wetaba, ha’u haree katak sira na’in 7 ne’e nesesariu duni atu ita apoia tanba atu dehan sira ne’e doubru no sira grave loos, lolos governu tenke haree ona saida mak ita bele halo no bele apoiu ba sira nune’e sira bele utiliza ka konsumu loro-loron,” katak Diretór KDSTO, Alfredo do Santos ba jornalista sira iha suku ha’uk Segunda semana ne’e.
Alfredo haktuir, nia rasik rekolla informasaun iha semana kotuk hodi halo negosiasaun ho parte relevantes sira hanesan CNR ho MSSSI munisípiu Covalima hodi fo apoiu ba maluk defisiénsia na’in hitu ne’e.
“Ha’u mai rekolla tiha ha’u fila fali ba saida mak ha’u halo, iha momentu ne’eba ha’u mos komesa halo negosiasaun ho entidades relevante sira hanesan ho parte Centru Nasional Reabilitasaun, Ministeriu Solidariedade Sosial no Inkluzaun Munisipiu Covalima nune’e konkorda malu ho MSSI Covalima ita hetan apoiu sasan ne’ebé mak iha hanesan fo’os ho sasan sira seluk tan, apoiu ida ne’e hanesan apoiu imediatamente ba sira na’in 7 ne’ebé iha” informa Diretor KDSTO munisipiu Covalima Alfredo do Santos.
Marsiana Moniz hanesan familia husi benefisiariu Difisiente, orgullu tanba KDSTO ho ekipa fo apoiu nesesidade baziku ba ema ne’ebe moris ho kondisaun difisiensia.
“Ami sente orgullu uitoan tanba ohin bele husi KDSTO, hanesan la barak, maibé sira suporta netik fo’os saku ida, maibé hakarak hato’o deit katak durante ne’e alin Agrifino han deit sun depois nia toba fatin mos la seguru tan ne’e hanesan familia difisiente hakarak husu ba governu katak karik ba oin ne’e atu kontinua fo apoiu karik haree mos kona ba ninia toba fatin no hahan liliu ba sun se lori foos mai pasiensia nia labele han” nia informa.
Entertantu maluk difisiente na’in iha Aldeia Ai-Oan no Wetaba maioria ho tipu difisiensia la hanesan balu iha difisiensia liman, balu matan, tanba ne’e tuir planu KDSTO Munisipiu Covalima katak semana oin sira na’in 7 sei hetan mos vizita husi Gabinete Prezidente repúblika nian.
Jornalista : Julio Salinas
Editor : Chamot Nahac
