Covalima (RCCT) 12-07-23–Kay Olo hakarak lao tuir nia aman Kay Rala Xanana Gusmão atual Primeiru Ministru nia ain fatin hodi tau matan ba povu kiik sira ne’ebe moris iha susar no terus nia laran no liliu ba komunidade sira ne’ebe foin lalais iha semana kotuk liu ba, hasoru dezastre inundasaun be’e tama sira nia uma no estraga sira nia ai han iha to’os laran no natar.

Tan ne’e maka kuarta feira loron 12 fulan Julu 2023 Kay Olo ho nia ekipa hakat ba Aldeia Ai-Oan, Suku Lalawa, Postu Administrativu Tilomar hodi apoiu nesesidade bazika ba vitima inundasaun xefe familia 5 ne’ebe foin lalais hetan dezastre inundasaun bee hoban sira nia ai han iha to’os laran no bee tama sira nia uma.

Administrador Postu Administrativu Tilomar Bendito Maia ba Suai Post agradese no fo obrigado ba Avo Nana atual Primeiru Ministru ne’ebe haruka ona nia oan mane Kay Olo hodi ai han balu mai apoiu komunidade sira ne’ebe afeta ba inundasaun ne’ebe foin lalais akontese, no kontinua husu Avo Nana atu loke matan ba komunidade.

Tuir Administrador Postu Tilomar Bendito Maia afirma iha Aldeia Ai-Oan hamutuk Xefe familia uma kain lima maka ohin hetan ona apoiu nesesidade baziku husi Avo Nana nia oan mane Kay Olo.

Entertantu nesesidade bazika sira maka hanesan foos, Biskuit, Supermi, sponza no sasan nesesidade baziku sira seluk, hafoin remata apoiu nesesidade baziku ba komunidade iha Aldeia Ai-Oan Kay Olo ho nia ekipa foti ain husi fronteira Tilomar kontinua apoiu ho sasan ne’ebe hanesan, ba vitima sira iha Aldeia Maukola Suku Beko, Postu Administrativu Suai.