Covalima (RCCT) 09-03-24-Xefe Aldeia Oebaba, Suku Raimea, Postu Administrativu Zumalai Munisipiu Covalima Bendito do Rego laran taridu tanba dadaun ne’e kafenutu mosu barak ameasa estraga komunidade nia platasaun iha to’os no natar laran.
Lideransa Komunitaria iha Aldeia Oebaba ne’e konta ba Radio Comunidade Cova Taroman Sabadu (09/03) dehan, pesti “kafenutu” ne’e foin mosu barak iha fulan marsu nia laran, nune’e nia preokupa kafenutu bele estraga hotu komunidade sira nia plantasaun hanesan batar iha to’os no haree iha natar laran, tanba Xefe Aldeia Oebaba husu ba Ministeriu Agrikultura Pekuaria Peska no Floresta (MAPPF) tau atensaun lalais hodi hamate tiha Pesti kafenutu ne’e.
“Husu ba na’i ulun governu liu liu ba Ministeriu Agrikultura Pekuaria Peska no Floresta atu bele lalais atende hodi hamate kafenutu ne’ebé oras ne’e mosu mai barak, kuandu la tau atensaun lalais maka sira sei estraga hotu batar kuda iha to’os no haree iha natar no ai han sira seluk ne’ebé moris, tan ne’e husu MAPPF atu bele prepara ai moruk oho pesti “kafenutu” oras ne’e komesa mosu barak Aldeia Oebaba, kafenutu daudaun ne’e mosu barak hanesan ita haree agora ne’e iha rai mamuk mos du’ut deit mos tahan laiha hotu ona tanba sira han hotu karik ida ne’e la hamate maka sira semo tama ba iha to’os no natar laran batar ho haree sira bele han hotu” informa Xefe Aldeia Oebaba Bendito do Rego, ba RCCT iha Aldeia Oebaba Sabadu (09/03).
Diretór Servisu Munisipál Agrikultura Munisipiu Covalima, Lino Magno, mos rekuñese katak dadaun ne’e kafenutu mosu barak “nakonu” iha Oebaba ne’ebe maka fo ameasa bo’ot ba plantasaun ne’ebé komunidade sira kuda iha natar ho to’os laran. Tan urjentimenti sei pasa informasaun ba iha Ministeriu para bele tau atensaun lalais hodi hamate pesti kafenutu ne’e.
“Kafenutu ne’ebé agora daudaun ita haree no hasoru daudaun ne’e ameasa bo’ot ba ita nia natar ho to’os ne’ebé to’os na’in no natar na’in sira kuda daudauk, ne’ebé ida ne’e ami sei hato’o informasaun husi munisipiu ba iha nasional atu nune’e bele resolve lalais problema ida hanesan ne’e tanba ha’u hatene katak iha munisipiu seluk seidauk mosu kafenutu ida ne’e, kafenutu ida ne’e maka estraga duni sasan iha natar laran no to’os laran, hanesan agora ita haree du’ut nurak sira ataka tan mate hotu, ohin kedas ha’u sei pasa kedas informasaun ne’e ba iha diresaun nasional hodi resolve lalais, tanba kafenutu ida ne’e tama iha pesti ida ne’ebé atu estraga ita nia hahan ne’ebé povu sira kuda” nia dehan.
Entertantu Pesti kafenutu ne’e foin maka mosu barak iha Aldeia Oebaba iha haleu fulan marsu tinan ne’e, maibe iha amesa bo’ot ba komunidade nia plantasaun sira ne’ebé kuda iha to’os no natar laran, tanba ne’e governu liu husi MAPPF tenki halo intrevensaun lalais molok populasaun hamotuk 1.279 no xefe familia hamutuk 158 iha Aldeia Oebaba, Suku Raimea, Postu Administrativu Zumalai sai vitima husi pesti kafenutu nia kabun bosu.
Jornalista : Julio Salinas
Editor : Chamot Nahac
