Covalima (RCCT) 14-08-23–Relasiona ho selebrasaun loron internasional Juventude ne’ebe realiza husi Centru Juventude Covalima, ho tema ablidade verde ba juventude iha dezenvolvimentu sustentavel ba mundu, tan ne’e Sekretariu Munisipiu Covalima Francisco de Jesus Alves husu foin sae sira tenke promove talentu hodi hametin fraternidade entre juventude sira iha Covalima.

Sekretariu Munisipiu Covalima Francisco de Jesus Alves, hato’o lia hirak ne’e iha nia diskursu Sabadu kalan foin lalais ne’e katak ho tema ne’e importante tebes ba joven sira atu promove talentu, kapasidade no selebrasaun ida ne’e atu hametin fraternidade entre juventude sira hodi hadok-an husi atividade negative sira.

“Hau hanoin ho tema ida ne’e importante tebes ba foin sae sira atu promove talentu no kapasidade, hametin fraternidade entre joven sira hodi hadok-an husi atividades negativu sira ne’ebe halo ema hotu la gosta”Sekretariu Munisipiu ne’e dehan.

Diretor Nasional Juventude Jacinto Ximenes kongratula ba Centru Juventude Covalima ne’ebe hala’o ona atividades oi-oin hodi selebra loron internasional Juventude iha Covalima.

“Hau lori governu liu husi Ministeriu Juventude Arte no Kultura kongratula ba Centru Juventude Covalima bele realiza atividades oi-oin komemora loron internasional Juventude iha Covalima” nia dehan.

Diretor Ezekutivu CJC Calistro Leite Gusmão, hatete ho tema ne’ebe iha atu hasae konsiensia no promove sensibilizasaun kona-ba pratika sustentavel entre joven sira.

“Tuir ita nia hanoin tema ida ne’e refleta tebes ba foin sae sira atu hasae konsiensia no promove sensibilizasaun kona-ba pratika sustentavel entre joven sira hodi kria pas no dame iha rai Covalima” Diretor Ezekutivu CJC Calistro Leite Gusmão, esplika

Entertantu Centru Juventude Covalima realiza selebrasaun loron internasional juventude ho tema ablidade verde ba juventude iha dezenvolvimentu sustentavel ba mundu, tanba hetan apoiu finanseiru husi governu liu husi Ministeriu Juventude Desportu Arte no Kultura ho total orsamentu hamutuk dolar Amerikanu rihun 5, no hetan apoiu mos UNFPA ho montante orsamentu hamutuk dolar Amerikanu rihun 4, ba atividades ne’ebe hala’o durante loron hirak nia laran maka hanesan seminariu, kompetisaun diskursu publiku, kompetisaun tebe original, limpeza jeral, doasaun ran, halai taru karon, dada tali entre feto no mane, han kerupuk, marsa saudavel, sae bua no no kalan animasaun.