.png)
Covalima (RCCT) 04-01-24-Jogu tradisionais sira ne’ebé loke lemo lomo iha teritoriu Munisipiu Covalima hanesan jogu tradisionais Bola Guling (bola duir) kuru kuru no manu futu durante ne’e seidauk iha lisensa.
Sekretariu Munisipiu Covalima Francisco de Jesus Alves, dehan tempu badak sei hapara para hotu jogu tradisionais sira ne’ebé laiha lisensa.
“Hakarak hato’o katak jogu tradisional hanesan bola guling, kuru-kuru no futu manu ne’e tuir dekretu lei Numeru 10/2008 kona ba statutu estrutura inspetor jeral jogus nian katak tenke hetan autorizasaun ka ka lisensa husi inspetor de jogu maka foin bele halo atividade jogu sira ne’e, tanba sira ne’ebe ha;a’o atividades jogu ne’e presija iha lisensa no selu taxa ka kolekta koima hodi bele selu ba estadu, tuir dekretu lei ne’e rasik hatete, maibe ohin loron jogu bola guling, kuru-kuru futu manu ne’ebe namkari iha Munisipiu Covalima nia laran ne’e barak tebes maibe seim iha lisensa ruma, autoridade lokal mos la hatene, dala ruma publiku julga fali dehan autoridade lokal fo autorizasaun sira hodi hala’o atividade jogu tradisionais sira ne’e, tanba ne’e mak ami hato’o ona ba iha Komandante PNTL Munisipiu Covalima liu husi telefoni verbalmente ami hato’o maibe sei dauk iha asaun ruma atu bele hapara tanba ne’e maka ami hakerek mos karta ba komandante munisipiu” dehan Sekretaria Munisipiu Covalima Francisco de Jesus Alves, ba RCCT iha nia knar fatin Adminidtrasaun Munisipiu Covalima Kinta (04/01/24).
Nia afirma haruka ona ba Komandu Polisia Covalima atu bele orienta membru sira hodi halo operasaun ba Jogu Tradisionais ne’ebe mak seidauk iha lisensa ne’e.
“Hau hanoin karta ne’e ita halo deit ba iha Komandante PNTL atu halo operasaun ba, tanba sira jogu ilegal ita lapresija halo halo karta ba sira, se sira iha karta lisensa karik normalmente sira tenke fo kopia ida ba administrasaun munisipiu Covalima atu bele hatene tuir, maibe to’o ohin loron karta lisensa ruma husi jogu bola guling sira ne’e mai munisipiu, tan ne’e mak hau husu PNTL atu apoiu administrasaun munisipiu Covalima bele hapara total jogu ilegal sira ne’ebe mak namkari iha munisipiu laran tomak iha fain publiku ka iha fatin uma privadu sira ne’ebe mak sei halo operasaun jogu sira ne’e tenke” nia informa.
Engkuantu bazeia ba asuntu refere Administrasaun Munisipiu Covalima hato’o pedidu ba Komandante PNTL Munisipiu Covalima atu bele hapara jogu tradisionais ilegal hanesan bola guling no kuru-kuru ne’ebé hala’o atividade iha fatin publiku no uma privadu ne’ebé iha autorizasaun husi autoridade lokal no inspetor jeral jogus, tanba tuir dekretu lei Numeru 10/2008 katak jogu tradisonal sira tenke iha autorizasaun husi inspetor jeral de jogu no selu taxa, maibe durante ne’e atividade hirak ne’e la’o, la iha lisensa no la selu taxa ba estadu.
