Covalima (RCCT), 28 Setembru 2026 — Inspetór Jerál PNTL, Komisáriu Asistente Hermenegildo Gonçalves da Cruz, hala’o inspesaun jerál iha Komandu PNTL Munisípiu Covalima, atu avalia diretamente sistema operasaun, prevensaun no kombate krime, administrasaun, jestaun orsamentu no ekipamentu.
Inspesaun ne’e parte husi atividade Inspesaun Jerál PNTL ne’ebé antes hala’o ona iha munisípiu Lautém, Viqueque, Baucau no Manatutu.
Komisáriu Asistente Hermenegildo Gonçalves da Cruz hateten katak inspesaun ne’e importante atu identifika diretamente se sistema servisu iha komandu sira hala’o ho efisiénsia no efikásia, no atu determina área sira ne’ebé presiza hadi’a.
“Objetivu mak atu haree diretamente sistema jestaun no servisu ne’ebé hala’o iha komandu. Se iha sistema ne’ebé seidauk di’ak, presiza hadi’a atu bele aumenta efisiénsia no efikásia servisu,” nia hateten ba jornalista sira hafoin hala’o inspesaun iha Komandu PNTL Munisípiu Covalima.
Nia subliña katak dezenvolvimentu rekursu umanu mos sai prioridade, liuliu liuhusi hasa’e kapasidade sargentu no ajente PNTL sira, atu iha kompeténsia no abilidade ne’ebé natoon hodi hala’o knaar seguransa no ordem públika.
Ba Munisípiu Covalima, Inspetór Jerál hateten katak Komandu PNTL iha membru liu na’in 100, enkuantu númeru populasaun munisípiu nian liu ema 90,000. Kondisaun ne’e, tuir nia, hatudu nesesidade atu aumenta rekursu umanu iha instituisaun polísia.
“Ho rekursu ne’ebé limitadu, membru ida bele responde ba populasaun besik ema 800. Tanba ne’e, presiza konsidera rekrutamentu no distribuisaun pesoál tuir nesesidade,” nia esplika.
Aleinde nesesidade rekursu umanu, Komandu PNTL Covalima mos iha importánsia estratéjika tanba nia lokalizasaun iha área fronteira. Munisípiu Covalima mos iha projetu dezenvolvimentu estratéjiku, inklui Suai Supply Base no Aeroportu Suai, ne’ebé presiza apoiu seguransa husi PNTL.
Inspetór Jerál hateten katak rezultadu husi inspesaun no auditoria ne’e sei sai referénsia ba PNTL atu hadi’a sistema servisu no dezenvolve kapasidade instituisaun, liuhusi prosesu avaliasaun no akompañamentu ne’ebé hala’o kada tinan.
Jornalista: Paul Mandeu
