Auditor Gabinete Inspesaun Jeral Ministeriu Edukasaun, Jose Cardoso dos Reis iha nia intervensaun hatete hafoin simu orientasaun urjente husi Ministra Edukasaun no Sekretaria Estadu Ensinu Sekundaria Jeral no Tekniku Vokasional, inspesaun Jeral iha ME fahe ba ekipa 6 kobre ba munisipiu hotu hodi halo enkontru urjente ho diretor eskola sira.

“Servisu ida ne’e realiza tanba ho orientasaun urjente husi Ministra Edukasaun no Sekretariu Estadu Ensinu Sekundaria Jeral no Tekniku Vokasional, inspesaun jeral fahe ba ekipa 6 hodi kobre Munisipiu hotu iha teritoriu laran tomak, tanba ne’e ha’u ho ekipa ida monu iha Munisipiu Manufahi ho Covalima, tan ne’e ekipa inspesaun mai iha Covalima haree liu ba asuntu valor ezame, tanba iha media sosial katak inan aman barak deskontente komportamentu ka hahalok manorin na’in sira nian, tanba valor sira ne’ebé maka oferese, tuir inan aman sira nia hanoin katak iha indikasaun valor ne’e la justu, tan ne’e Ministra Edukasaun orienta inspesaun jeral atu mai atu asegura” dehan Auditor Gabinete Inspesaun Jeral Ministeriu Edukasaun, Jose Cardoso Dos Reis iha nia intervensaun hafoin hala’o sorumutu urjente ho diretor eskola sira iha Covalima Kinta (21/12/23).

Diretor Servisu Munisipal Edukasaun Munisipiu Covalima Francelino Freitas Carvalho haktuir, ho prezensa inspesaun Jeral iha Covalima atu fanun diretór eskola sira bele hala’o k’nar ho responsabilidade oinsa atu bele maneja eskola sira ho di’ak iha futuru.

“Enkontru ida ne’e ho karakter urjensia, maibe ekipa husi nasional la’os tun mai deit iha Covalima maibe kobre hotu munisipiu sira iha teritoriu laran tomak, sira nia prezensa iha ne’e atu fo hanoin ba ita, fo neon moris ba ita oinsa maka hanesan dirijente eskola bele halo ita bo’ot sira nia k’nar ho didi’ak hodi dirije eskola sira hahu kedas husi ensinu baziku, ensinu sekundaria jeral ho tekniku vokasional, liu husi enkontru urjensia ne’e sei ko’alia mos konaba valor ezame ninian, ligadu mos ho sirkular ne’ebé husi ministeriu fo sai maibe ida ne’e ita nia señor auditor sei esklarese di’ak liu ba ita hotu iha fatin ida ne’e” nia dehan.

Entertantu enkontru urjensia ne’e hala’o iha salaun Eskola Sekundaria Jeral Publiku Suai, no dirije husi Auditor Gabinete Inspesaun Jeral Ministeriu Edukasaun, Jose Cardoso Dos Reis ne’ebé akompaña husi Diretór Servisu Munisipal Edukasaun Munisipiu Covalima Francelino Freitas Carvalho, Superientedente Edukasaun Munisipiu Covalima inklui hetan partisipasaun masimu husi diretór eskola ensinu baziku, esnsinu sekundaria no Eskola Tekniku Vokasional Akarar laran no eskola tekniku vokasional Claret Salele.

Jornlista : Julio Salinas

Editor : Chamot Nahac