Covalima (RCCT) 10-01-24—Kumpri desizaun ministeriu edukasaun, Eskola Sekundaria Geral Publiku (ESGP) Suai simu estudante foun ano letivu 2024 nian hamutuk ema na’in 540, ho desizaun ne’e maka estudante finanlista husi Eskola Ensino Baziku Central iha Postu Administrativu Suai hamutuk na’in 204 to’o oras ne’e seidauk hetan oportunidade rejista iha eskola sekudanria jeral.

Maske nune’e parte edukasaun nafatin motiva inan no aman estudante atu haruka oan sira asesu ba eskola Tekniku Vokasional Akar Laran, Eskola Sekundaria Geral Zumalai no Eskola Sekundaria Geral Fohorem, maibe inan aman nafatin mantein hakarak sira nia oan asesu ba iha ESGP Suai, tanba distansia Suai ba Zumalai no Fohorem dok no mos lakohi haruka oan ba eskola iha ESTV Akar Laran tanba konsidera eskola moru laiha no kestaun seguransa no risku ba dezastre ne’ebé sai preokupasaun.

“maibe atu haruka oan sira ba eskola iha Zumalai distansia ho Suai ne’e kilometru hira, Suai ba Fohorem distansia kilometru hira depois husi Suai ba Akar Laran sim ne’e besik maibe husi inan aman la simu ho eskola ne’ebé, Akaran laran eskola ne’ebé kualidade duni, ami hatene duni katak eskola tekniku vokasional ne’e importante ba ami mos, ami nia oan sira atu sai matenek, maibe ita hatene katak Covalima ne’e tempu udan hanesan ne’e mota sae beibeik se karik ami nia oan sira hetan dezastre se mak atu responsabiliza inan aman ka eskola ou ministeriu no manorin na’in sira” Mikael Amos Neno lekar lia hirak ne’e iha Edukasaun Munisipiu Covalima Tersa (09/01/2024).

Mikael Dehan tan “Ha’u nudar inan aman hakarak husu tanba ohin dehan katak eskola iha Zumalai vaga sei simu estudante foun ne’e sei iha, iha Fohorem mos hanesan sei kontinua atu simu estudante foun no iha Akar laran mos sei simu nafatin estudante foun, tanba ne’e ami simu desizaun husi Ministeriu Edukasaun hatun, maibe ha’u hatene katak iha loron segunda no Tersa Eskola Segundaria Geral Publika Suai hahu loke inskrisaun simu estudante foun maibe derepente deit ministeriu hatun sirkular ida mai iha ESGP katak inskrisaun ba simu estudante foun taka” Tenik nia.

Fatin hanesan Ricardo Barros Hendrigue prontu atu haruka oan ba eskola iha Akar Laran maibe sei konfuzaun konaba resposabilidade ba seguransa, tanba eskola ESTV Akar Laran laiha moru no distansia dok.

“Loos hanesan ohin ita boot sira esplika dehan ESGP Suai taka no la simu ona estudante foun di’ak liu haruka oan sira ba eskola iha Akar Laran no iha Zumalai no Fohorem, eskola tekniku vokasional Akar Laran ne’e di’ak maibe sei maka atu responsabilza ba ami nia oan sira liliu kona ba seguransa, distansia dok, moru laiha, eskola kualidade hotu asrama laiha halo nusa mak ami nia oan feto sira bele ba eskola iha ne’eba” nia dehan.

Hatan ba Preokupasaun inan aman sira nian ne’e, Auditor Gabinete Inspesaun Jeral Ministeriu Edukasaun, Jose Cardoso dos Reis, hatete konaba seguransa, distansia dok no risku ba dezastre inklui moru laiha sei labele responde, maibe sei hato’o preokupasaun ne’e ba Ministra Edukasaun ho Sekretaria Estadu.

“Kestaun ida kona ba Eskola Akar Laran liliu konaba seguransa ho ameasa dezastre naturais hanoin ha’u labele responde, ne’ebé rona didi’ak ha’u lakohi responde buat ida ne’ebé la’os ha’u nia kompetensia rona didiak ami nia ekipa ne’e lakohi tama ba iha situasaun ida ne’ebé ami labele halo, responde kona ba seguransa, dezastre maibe ami sei lori imi nia preokupasaun ne’e ba hato’o sua exelensia na’in rua para hare, distansia dok husi Suai ba Zumalai no Fohorem ne’e mos ha’u labele foti desizaun hodi responde maibe buat hotu ministeriu maka bele foti desizaun” nia dehan.

Entertantu reprezentante inan no aman iha Suai hakarak sira nia oan atu eskola hotu iha Eskola Secundaria Geral Publiku Suai, maibe tuir despaixu ne’ebé ministeriu hatun katak ESGP sei simu deit estudante foun ba ano letivu 2024 ema na’in 540 deit, maibe oras ne’e daudaun estudante finanlista hamutuk na’in 204 ne’ebé rejista ona iha edukasaun covalima atu eskola iha ESGP suai, seidauk iha fatin ba sira atu eskola tanba ESGP Suai kumpri despaixu ne’ebé ministeriu Edukasaun fo sain ona.

Jornalista : Moichung/Julio Salinas

Editor       : Chamot Nahac