Covalima (RCCT) 21-12-23–Inan Aman estudante sira iha Covalima deskorda ho desijaun Ministeriu Edukasaun liu husi Despaixu ho numeru 31/12/GME 2023 ne’ebe fo limitasaun ba eskola sekundaria sira simu estudante foun.

Nune’e Inan aman sira iha Covalima, Konsidera Despaixu Ministerial ne’e la kondis ho situasaun iha munisipiu Covalima tan ne’e Inan Aman Estudante sira husu ba Ministeriu Edukasaun atu rezolve situasaun ida ne’e ho urjentemente.

“Bazeia ba despaixu Ministeriu Edukasaun katak limitasaun estudante foun ne’ebe remata ona pre-sekundaria atu kontinua ba nivel sekundaria maibe despaixu husi ME katak limita numeru estudante foun iha tinan ida ne’e, ami nudar inan aman la konkorda ho despaixu Ministra Edukasaun fo sai, tanba despaixu ho numeru 31/12/GME 2023, ne’e la kondis ho ami nia situasaun iha Munisipiu Covalima, ME tenke resolve problema ne’ebe oras ne’e daudaun inan aman ho estudante sira preokupa no husu Ministra atu bele tun direita mai iha Covalima hodi hasoru inan aman iha tempu badak hodi buka solusaun” Portavos Tome de Sena Saran lia husi Konfrensia Imprensia iha eskola sekundaria jeral publiku suai Kinta (21/12)

Inan Aman estudante sira mos prokupa kuandu ho despaixu husi Ministeriu Edukasaun fo limitasaun ba eskola sekundaria jeral sira simu estudante foun maka povu nia oan sira sei abandona sira nia edukasaun formal iha eskola.

“Ami la simu limitasaun husi Ministeriu Edukasaun tanba ami nia oan ne’ebe atu mai rejista naran foun iha Eskola sekundaria Jeral Publiku Suai maibe husi parte eskola dehan la simu ona estudante foun, maibe la simu tan ona labarik sira ne’e atu ba eskola iha ne’ebé, karik iha eskola ne’e kuandu manorin nain voluntaria sira duke hasai sira diak liu fo oportunidade nafatin ba sira hanorin inan aman maka bele selu” veteranu ne’e dehan.

Hatan ba ne’e preokupasaun inan aman ne’e Auditor Gabinete Inspesaun Ministeriu Edukasaun Jose Cardoso dos Reis via telefoni liga direita ba iha Diretór Geral Ensino sekundaria no Tekniku Vikasional, Deolindo da Cruz, responde liu husi telefoni hatete bazeia ba despaixu Ministra Edukasaun eskola sekundaria geral publiku Suai simu deit estudante foun hamotuk ema na’in 540 hodi responde ba sala eskola ne’ebé iha hamutuk sala 12.

“Covalima nian, konforme despaixu Ministra Edukasaun ba ESGP Suai tinan ne’e simu deit estudante foun 540 tanba sala eskola ne’ebé husi Covalima relata ba iha nasional iha salal 12 deit mamuk bele disponivel ba simu estudante foun ba iha kelas 1 deit, enkuantu sala seluk ne’e ba estudante kelas 2 no kelas 3, sirkular ne’e ninia natureza ba deit ensinu sekundaria no ba eskola tecniku vokasional maibe ba eskola privadu lae” esplika diretór Geral Ensino sekundaria no Tekniku Vikasional, Deolindo da Cruz, via telefoni.

Despaixu Ministeria ho numeru 31/12/GME 2023 ba eskola sekundaria publiku Suai simu estudante foun ba tinan ne’e hamotuk ema na’in 450, maibe oras ne’e daudaun estudante finalista barak iha Covalima maka seidauk rejista.

Ekipa Kobertura RCCT

Editor : Chamot Nahac