COVALIMA—-Reprezentante estudante inan-aman husi Aldeia Fatuisin, Suku Kamanasa, Antonio Carvalho de Araujo, apresia ho planu Eskola Sekundaria Geral Publika ESGP Suai loke eskola paralela rua iha Covalima hanesan ida iha Aldeia Sanfuk no ida iha Salele, Tilomar, tanba tuir inan-aman nia hanoin katak loke tan eskola paralela rua ne’e bele hakman ona inan-aman nia kbi’it ekonom8a liliu hodi selu transporte bainhira oan sira husi uma ba eskola.
“Ba hau estadu loke eskola iha ne’ebe deit diak hotu, maibe kuandu governu liu husi Ministériu Edukasaun Juventude no Desportu lori eskola hakbesik ona ba iha ita nia let ne’e ita sente orgulhu (bersyukur), ne’ebe estadu forma ona hanesan ne’e inan ho aman hein hatan deit, maibe buat ida kualidade eskola dependa ba inan ho aman se bainhira ita hakarak atu haruka oan sira ba eskola iha ne’ebe deit bele, maibe bainhira governu halo planu loke eskola iha ita nia knua laran ba hau diak liu tan no besik liu tan uma, ita ladun gastu osan, inan aman haree tuir oan sira ba eskola no sosa livru deit” informa Reprezentante inan-aman husi Aldeia Fatuisin, Suku Kamanasa, Antonio Carvalho de Araujo, ba jornalista sira hafoin lori oan ba rejista iha Eskola central ESGP Suai, Segunda (09/01).
Antonio afirma nia parte hanesan inan-aman apoiu tanba estadu halo diak liu tan hodi loke tan eskola paralela iha Sanfuk ne’e diak liu tan, no bele hamenus gastu orsamentu inan-aman nian ba iha transporte, oan sira bele foka deit ba iha estudu.
Nune’e mos Reprezentante estudante inan aman husi Postu Administrativu Fohorem Alsinda Soares, haktuir politika ESGP loke tan eskola sekumdaria paralela iha Salele Tilomar ne’e bele ona hakman inan-aman sira gastu orsamentu ba iha transporte nian tanba durante oan sira husi Fohorem mai eskola iha ESGP Suai hela iha kost no balu hela tuir familia sira iha Suai mak foin hodi eskola.
“Hau hanoin politika ESGP nian loke tan eskola paralela iha Salale Tilman ne’e bele hakbesik ona eskola ba iha ko.u 8dade no hakman ona osan transporte ba oan sira mai eskola iha Suai, tanba husi Postu Fohorem mai iha Suai dook liu ne’ebe ho loke eskola iha Salele ne’e ami sente diak tanba husi Fohorem mI Salele besik ona” nia dehan.
Nia dehan durante ne’e oan sira husi Fohorem mai eskola iha ESGP Suai hela deit ho ema dala ruma halo oan sira estuda lasiak, servisu mos barak ne’e mak ho loke tan eskola iha Salele ne’e hanoin diak ona ba inan-aman sira hodi redus ona gasta orsamentu ba iha transporte no selu osan ba uma kost ka hela iha ema nia uma kada fulan selu ba oan sira hodi hela ba.(Azu)
